ევროპის საბჭომ, საქართველოს შესახებ, კორუფციის წინააღმდეგ მებრძოლ სახელმწიფოთა ჯგუფის (GRECO) მეოთხე ანგარიში გამოაქვეყნა. ანგარიში საკანონმდებლო ხელისუფლებაში, სასამართლო სისტემასა და პროკურატურაში არსებულ გამოწვევებს მიმოიხილავს და საქართველოს არსებული პრობლემების მოსაგვარებელ რეკომენდაციებს სთავაზობს. ამის შესახებ ინფორმაციის ინფორმაციის თავისუფლების განვითარების ინსტიტუტი (IDFI) ავრცელებს.

„ანგარიშის მიხედვით, მიღწეული შედეგების მიღმა მნიშვნელოვანია ყურადღება დაეთმოს ძალაუფლების დანაწილების პრინციპის განმტკიცებას, სასამართლო სისტემის რეფორმას და პროკურატურის პოლიტიკური ზეგავლენისგან სრულად განთავისუფლებას და საზოგადოებრივი ანგარიშვალდებულების გაზრდას,“ - აღნიშნულია IDFI-ს განცხადებაში.

გთავაზობთ კორუფციის წინააღმდეგ მებრძოლ სახელმწიფოთა ჯგუფის რეკომენდაციებს:

  • გაიზარდოს კანონში შესული ცვლილებების და კომიტეტების მუშაობის შესახებ ინფორმაციის ხელმისაწვდომობა და ჩამოყალიბდეს საჯარო კონსულტაციების მარეგულირებელი ერთიანი ჩარჩო და პროცედურები;
  • შეიქმნას და დამტკიცდეს სავალდებულო ეთიკის კოდექსი, სადაც გათვალისწინებული იქნება ინტერესთა კონფლიქტის სხვადასხვა შემთხვევა;
  • შემუშავდეს მექანიზმი, რომელიც დაავალდებულებს პარლამენტის წევრებს, გაამჟღავნონ ინტერესთა შეუთავსებლობის შემთხვევები და, ამავდროულად, შესაძლებელი გახდეს ამ შემთხვევების მონიტორინგი;
  • მოსამართლეთა შერჩევისა და დაწინაურების წესების რეფორმირება, იუსტიციის უმაღლესი საბჭოს მიერ მიღებული გადაწყვეტილების ობიექტურ, წინასწარ განსაზღვრულ კრიტერიუმებზე და მათი სასამართლოში გასაჩივრების შესაძლებლობა;
  • მოსამართლეთა გადაყვანის შესახებ რეგულაციის მიღების შემთხვევაში, ის უნდა შეიცავდეს მოსამართლეთა თანხმობის გარეშე მათი სხვა სასამართლოში გადაყვანის ბოროტად გამოყენების წინააღმდეგ ადეკვატურ გარანტიებს;
  • გადანაწილებას ავტომატური (ელექტრონული) სისტემის მეშვეობით შემთხვევითი შერჩევის პრინციპით;
  • მოსამართლეთა ეთიკის კოდექსის განახლებაზე მუშაობის გაგრძელება, მისი ყველა მოსამართლისთვის გაცნობა და საჯარო ხელმისაწვდომობა;
  • გატარდეს საჭირო ზომები მოსამართლეთა დისციპლინური წარმოების ეფექტურობის, გამჭვირვალობისა და ობიექტურობის გასაზრდელად;
  • მთავრობამ მიიღოს საჭირო ზომები პარლამენტის/მთავრობის გავლენის შესამცირებლად მთავარი პროკურორის დანიშვნისა და საპროკურორო საბჭოს საქმიანობის პროცესში;
  • პროკურორთა დანიშვნისა და დაწინაურების ისეთი დეტალური რეგულირება, რომელიც უზრუნველყოფს გადაწყვეტილების მიღებას ზუსტი და ობიექტური კრიტერიუმების საფუძველზე (რომელიც იქნება საჯარო);
  • პროკურორებისთვის საქმეთა გადანაწილების ობიექტური და ნათელი კრიტერიუმების დანერგვის ვალდებულებას;
  • საქართველოს პროკურატურის მუშაკთა ეთიკის კოდექსის განახლებაზე მუშაობის გაგრძელება, პროკურორისთვის გაცნობა და საჯარო ხელმისაწვდომობა;
  • გადაიხედოს პროკურორთა დისციპლინირების არსებული რეჟიმი, მათ შორის, უფრო კონკრეტულად განისაზღვროს დისციპლინური დანაშაულები და უზრუნველყოფილი იქნეს სანქციების პროპორციულობა.