ქართული ოცნების ერთ-ერთი ლიდერი, სოზარ სუბარი ამბობს, რომ სადეპუტატო იმუნიტეტის მოხსნის შემდეგ, თუ სასამართლო მელიას პატიმრობას შეუფარდებს, ის აპირებს ნაციონალურ მოძრაობაში ჩაიკეტოს და წინ სხვა ადამიანები აიფაროს. დეპუტატი ამტკიცებს, რომ ნაციონალურ მოძრაობას მესამე პირის მეშვეობით ნიკა მელიასთვის გირაოს თანხის შეტანის და ამის ქართულ ოცნებაზე "გადაბრალების" გეგმა "ჩაუვარდა", ამიტომ პარტიამ "ახალი პროვოკაცია" დაგეგმა.

"ჩვენი ინფორმაციით, ნიკა მელია არ გამოცხადდება სასამართლოში და მართლმსაჯულებას დაემალება, რასაც ღიად ამბობენ კიდევაც. პროკურატურა კი ვალდებულია, რომ მის ხელთ არსებული ყველა ინსტრუმენტით ბრალდებული მართლმსაჯულების წინაშე წარადგინოს. ნაციონალური მოძრაობის რიგებიდან ჩვენ, ასევე, გვაქვს ინფორმაცია, რომელიც მათი საჯარო გამოსვლებითაც დასტურდება, რომ სადეპუტატო იმუნიტეტის შეჩერების შემდეგ, თუკი სასამართლო აღკვეთის ღონისძიების გამკაცრების თაობაზე პროკურატურის შუმადგომლობას დააკმაყოფილებს, ნიკა მელია ნაციონალური მოძრაობის ოფისში ჩაკეტვას და წინ სხვა ადამიანების აფარებას აპირებს, როგორც ეს ერთხელ უკვე გააკეთა 20 ივნისს", — თქვა სუბარმა.

ჟურნალისტების კითხვას, საიდან აქვს ეს ინფორმაცია, სოზარ სუბარმა უპასუხა, რომ სასამართლოში არმისვლაზე პარტია ღიად საუბრობს. რაც შეეხება ოფისში ჩაკეტვას, სუბარის თქმით, ამაზე ინფორმაცია ენმ-ის წევრებისგან აქვთ. მისივე თქმით, დღევანდელი განცხადების მიზანი პრეენციაა და თუ ასე არ მოხდება, პოლიცია შესაბამისად იმოქმედებს

დეპუტატის განცხადებითვე, ნიკა მელიას საკითხთან დაკავშირებით ოპოზიციას იმდენად "უარგუმენტო და ანტისახელმწიფოებრივი" პოზიცია აქვს, რომ დასახმარებლად კვლავაც გავრილოვის და რუსეთის ფაქტორის გამოყენება სცადეს და "როგორც ყოველთვის, რუსეთიდან მიიღეს ეს დახმარება".

"ხაზგასმით ვაცხადებთ, რომ მათი პროვოკაციული მცდელობების მიუხედავად, კრიმინალისგან წამებულს ვერ შექმნიან, საქართველო სამართლებრივი სახელმწიფოა, სადაც კანონის წინაშე ყველა თანასწორია და მიუხედავად იმისა, თუ რა პროვოკაციებს განახორციელებს კონკრეტული სამართალდამრღვევი პირი, მართლმსაჯულება აუცილებლად აღსრულდება", — თქვა სუბარმა.

დღეს პარლამენტი ნიკა მელიასთვის დეპუტატის იმუნიტეტის მოხსნას განიხილავს. პროკურატურამ საკანონმდებლო ორგანოს ენმ-ის ლიდერის დაკავებაზე ნებართვისთვის 12 თებერვალს მიმართა. იმის გამო, რომ მელია ოფიციალურად პარლამენტის დეპუტატია, მას იმუნიტეტი იცავს.

გენერალურ პროკურატურას მელიასთვის იმუნიტეტის მოხსნა სჭირდება იმისთვის, რომ სასამართლოს პატიმრობის შუამდგომლობით მიმართოს. იმუნიტეტის მოხსნის საკითხი კი პარლამენტის პლენარულ სხდომაზე უნდა გადაწყდეს.

პროკურატურამ ნიკა მელიას ერთკვირიანი ვადა მისცა, რათა გირაოს თანხა გადაეხადა, რომელიც მას ელექტრონული სამაჯურის მოხსნის შემდეგ დაეკისრა. ეს ვადა სწორედ 12 თებერვალს ამოიწურა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ამავე საქმეზე ნიკა მელიასთვის იმუნიტეტის შეწყვეტა პროკურატურამ 2019 წლის ივნისშიც მიმართა. მაშინ პარლამენტმა მხარი დაუჭირა მელიასთვის იმუნიტეტის მოხსნას და პროკურატურას მისი დაკავების უფლება თუმცა სასამართლომ მას პატიმრობის ნაცვლად გირაო შეუფარდა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს არჩევნებთან დაკავშირებულ საპროტესტო აქციაზე მელიამ ელექტრონული მონიტორინგისთვის განკუთვნილი სამაჯური მოიხსნა და განაცხადა რომ მას აღარ გაიკეთებდა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 ათას ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათასი ლარი შეეფარდა.