საზოგადოებრივი მაუწყებლის ახალმა მენეჯმენტმა გამოაქვეყნა 17-გვერდიანი დოკუმენტი, სადაც თავმოყრილია მაუწყებლის თანამშრომელთა მიერ აღწერილი პრობლემები. შეიძლება ითქვას, რომ სია დაუსრულებელია: გაფუჭებული მიკროფონები, კამერები, შტატივებისა და კომპიუტერების სიძველე, ნაკლებობა, 15 წლის ჩართვის აპარატები, უჰაერობა სამუშაო სივრცეში - ეს არის პრობლემების არასრული სია.

On.ge გთავაზობთ რამდენიმე საინტერესო ამონარიდს 17 გვერდში თავმოყრილი პრობლემებიდან, რომლებიც თავად თანამშრომლებმა აღწერეს:

• დღის განმავლობაში არაერთი ტექნიკური პრობლემა გვხვდება: ჩართვის აპარატები არის მინიმუმ 15 წლის, უვარგის მდგომარეობაში. უმეტეს შემთხვევაში, შეუძლებელია პირდაპირი ჩართვის განხორციელება;
• პერსონალური კომპიუტერების უმრავლესობა ძირითადად მოძველებულია, ისევე, როგორც სამონტაჟო პროგრამა. ეს უკანასკნელი არ განახლებულა ხუთი წელია. არ გვაქვს საკმარისი რაოდენობის კამერები (არსებული მოძველებულია). მიკროფონების ნაწილი აღარ ექვემდებარება შეკეთებას. გვაქვს მხოლოდ ორი სამაგრი მიკროფონი (ე.წ პეტლიჩკა), რაც არასაკმარისია. მოძველებულია კამერის ჩიპები. რამდენიმე წლის წინანდელია საეთეროს პულტიც, რაც თანამედროვე მოთხოვნებს ვეღარ აკმაყოფილებს. ჩვენ არ გვაქვს ერთიანი სამონტაჟო პროგრამა „დალეტი“, „ვიზარდი“ ან რამე მსგავსი, რაც გაგვიადვილებდა სამუშაო პროცესს და ადვილად აღქმადს გახდიდა პროდუქტს, სანამ ეთერში გავა;
• ცენტრალურ ნიუსრუმში მცირე ფართი, არაკონდიცირებადი გარემო, ფანჯრების არარსებობა კიდევ უფრო ამძიმებს სამუშაო პირობებს.
• საერთაშორისო ამბების განყოფილებას ესაჭიროება დამატებითი ტექნიკა, ასევე, კადრები და სასურველია საერთაშორისო სააგენტოების დამატება (გვაქვს როიტერი, სასურველია AP);
• ნიუსრუმს არ აქვს საკუთარი ცხელი ხაზი, რომელიც 24/7-ზე რეჟიმში იმუშავებს და საჭიროა დამატებითი ჯგუფის შექმნა. ნიუსრუმისთვის აუცილებელია სტილისტ- რედაქტორი, ასევე საჭიროა წამყვანებისა და კორესპონდენტებისთვის გარდერობის განახლება (კორესპონდენტები საკუთარი სახსრების იცვამენ);
• ბოლო ორი წელია, დაბალი ხელფასების გამო მოხდა კვალიფიციური კადრების გადინება. მაუწყებლის საინფორმაციო სამსახური არ აღმოჩნდა კონკურენტურანიანი ხელფასების მხრივ - სხვა არხებთან მიმართებაში, რამაც გამოიწვია კადრების დეფიციტი;
• მოძველებული აპარატურა ხშირად გამხდარა პირდაპირი ჩართვის ჩაშლის მიზეზი. ყოფილა შემთხვევები, როცა კრახით დასრულებულა ექსკლუზიურად მოპოვებული სტუმრის პირდაპირ ეთერში ჩართვის მცდელობა;
• საინფორმაციო სამსახურს არ აქვს არცერთი ქსელური პროგრამა, ე.წ. ვიორსტკები იწერება Word-ში. პროდიუსერებს არ შეგვიძლია მასალების, სიუჟეტების ნახვა კომპიუტერებში - მხოლოდ სამონტაჟოებშია შესაძლებელი, რომლებიც ხშირად ჟურნალისტების მიერაა დაკავებული. სუფლიორი იმდენად მოძველებულია, რომ ახალ Word-ს და Sylfaen-ს ვერ ხსნის და ვერ კითხულობს;
• შიდა ქართლი. კამერა: მონიტორი გაფუჭებულია, კამერას „ფლეშბეკი“ არ უმაგრდება, ხელით უჭირავს ოპერატორს. მიკროფონის სადგამი. მიკროფონს ხმის აღება უჭირს. ასევე, მანქანა ძალიან ცუდ მდგომარეობაშია;
• სამეგრელო - ზემო სვანეთი. კამერის „შუმავიკი“ (მიკროფონი) დაზიანებულია. რამდენჯერმე გავაკეთეთ, თუმცა, უშედეგოდ. განათება არ აქვს;
• ქვემო ქართლი. არ გვაქვს მიკროფონი, "პეტლიჩკით" ვმუშაობთ. განათება მობილურ ტელეფონს უფრო მაღალი აქვს. ასევე, კამერა შტატივზე არ მაგრდება, მორყეულია;
• სამცხე-ჯავახეთი. კამერის ეკრანი არ მუშაობს. ვიზირს ბალანსის გასწორება უჭირს. არ გვყავს ჟურნალისტი;
• კახეთი. პრობლემაა განათება, კამერის მონიტორი არის გაფუჭებული. არ გვაქვს მიკროფონი და ნათხოვარით ვმუშაობთ;
• არასაკმარისი და გაუმართავი ტექნიკის შესახებ საუბარი იმდენად ბანალურია, რომ სჯობს, გაცილებით დიდ პრობლემებზე ვისაუბროთ;
• ახალი სტრუქტურის მიხედვით გაჩნდა პოზიციები, რომელიც ხელოვნურად ქმნის ბარიერს, მაგალითად, მიმართულების ხელმძღვანელი და, ზოგადად, მიმართულების პროდიუსერები, რომელთა პოზიციები დუბლირებულია და უფრო მეტად მორგებულია პერსონას, ვიდრე სისტემას;
• ჩვენი გადაცემისთვის აუცილებლად გვჭირდება ვიდეოკამერების ჩიპები, რაც საზიარო გვაქვს ორ გადაცემას და გვიქმნის გარკვეულ პრობლემებს;
• ჩვენი გადაცემისთვის პირველ რიგში შესაცვლელი ან შესაძენია დეკორაცია, რომელიც არ პასუხობს გადაცემის შინაარსს;
• არ არის კომპიუტერები. ორი წამყვანი და ორი პროდიუსერი ერთი კომპიუტერის იმედად ვართ;
• არ გვაქვს პრინტერი და ექვსი წელია, ხან რომელ ოთახში დავდივართ ამოსაბეჭდად, ხან რომელში;
• მას შემდეგ, რაც გადაცემა ეთერში გავიდა ხარვეზით, მონტაჟის რეჟისორმა ახსნა, რომ ხარვეზი (კადრის დუბლირება) გამოწვეულია არალიცენზირებული სამონტაჟო პროგრამის (შეუძლებელია განახლება) და ვადაგასული (6 წლის) სამონტაჟო კომპიუტერით.

ვასილ მაღლაფერიძემ 6 თებერვალს წარმოადგინა მაუწყებლის განვითარების სამწლიანი გეგმა, რომელიც, სამეურვეო საბჭოს მიერ დამტკიცების შემთხვევაში, 2018 წლამდე, საინფორმაციო გამოშვების გარდა, ყველა გადაცემის შეჩერებას ითვალისწინებს.