ერთიანი ნაციონალური მოძრაობა მოითხოვს მოსამართლე ნატა ნაზღაიძეს შეუწყდეს უფლებამოსილება და გაუქმდეს რუსთავი 2 -ის საქმესთან დაკავშირებით მის მიერ მიღებული გადაწყვეტილებები.

აღნიშნულის შესახებ დღეს გამართულ ბრიფინგზე ხატია დეკანოიძემ ისაუბრა.

"მინდა გამოვეხმაურო კორუფციული გარიგების უპრეცედენტო ფაქტს, რომელიც შედგა მოსამართლე ნაზღაიძის ოჯახსა და მერიას შორის. მერიამ მთავრობის ბიუჯეტიდან - ხალხის კუთვნილი ფულით, რასაკვირველია ივანიშვილის დავალებით, მოისყიდა მოსამართლე ნაზღაიძე, რის შემდეგაც მან გამოიტანა უკანონო გადაწყვეტილება რუსთავის 2 საქმესთან დაკავშირებით".

ერთიანი ნაციონალური მოძრაობის წევრი აცხადებს, რომ "სასამართლო კორუმპირებულ სისტემად გადაიქცა", რომელიც ყოფილი პრემიერის, ბიძინა ივანიშვილის დაკვეთებს ასრულებს.

პოლიტიკური პარტია შემდეგი ოთხი მოთხოვნით გამოდის:

  1. საერთო სასამართლოების კანონის შესაბამისად იუსტიციის საბჭოსგან შეუწყდეს უფლებამოსილება მოსამართლე ნაზღაიძეს;
  2. მოვუწოდებთ უზენაესი სასამართლოს დიდი პალატის მოსამართლეებს გააუქმოს მოსამართლე ნაზღაიძის თავჯდომარეობით სააპელაციო სასამართლოს კოლეგიის მიერ მიღებული გადაწყვეტილება რუსთავი 2 საქმეზე;
  3. მოვითხოვთ, თბილისის მერიასა და მოსამართლე ნატალია ნაზღაიძის ოჯახს შორის დადებული მილიონიანი გარიგების გაუქმებას;
  4. გადადგეს თბილისის მერი და სისხლის სამართლის პასუხისმგებლობა დაეკისროს ყველა იმ პირს, ვინც დააორგანიზა ან უშუალოდ მონაწილეობდა ამ კორუფციულ გარიგებაში.

ტელეკომპანია რუსთავი 2-ის გადაცემა პოსკრიპტუმში გუშინ გავიდა რეპორტაჟი, რომელშიც ჟურნალისტური გამოძიების მიხედვით საუბარია იმაზე, რომ, რამდენიმე დღის წინ რუსთავი 2-ის საქმის მოსამართლე ნატა ნაზღაიძეს ძმამ ბიუჯეტიდან 1 მილიონი ლარი მიიღო.