რესპუბლიკური პარტიის წევრის, დავით ბერძენიშვილის განცხადებით, მათ ქართული ოცნება "მახეში გააბეს". მისი თქმით, რესპუბლიკელების ინიციატივამ კანონპროექტის კენჭისყრისთვის 1 დღით შესვლის შესახებ გამოაჩინა, რომ მმართველი გუნდი არ აპირებდა ცვლილებების დარეგისტრირებას და ეს იდეა მხოლოდ ოპოზიციაზე გადასაბრალებლად წარადგინა.

"არ ვფიქრობ ახლა [რომ ქართული ოცნება დაარეგისტრირებს კანონპროექტს უბარიერო პროპორციულ არჩევნებზე]. მაგრამ მათ დააპირეს ასეთი მარტივი კომბინაცია ერთსვლიანი, რომ მოდი ჩვენ ვიტყვით, რომ ჩვენ იმდენად კონსტრუქციულები ვართ, რომ ჩვენ მზად ვართ, დაბალი ბარიერი და ბუნებრივი ბარიერით საკონსტიტუციო ცვლილებები გავახორციელოთ და შემდეგი არჩევნები ჩავატაროთ სრულად პროპორციული, მაგრამ ოპოზიცია არ შემოდის და ხმები არ გვყოფნის. მათ ეს რომ თქვეს, ჩენ მაშინვე ვუთხარით, ახ, ესე, გექნებათ ხმები, დაარეგისტირეთ. ჩვენ ამითი დავიჭირეთ.

იმავე საღამოს, როცა ქართულმა ოცნებამ დაინახა, რომ ჩვენ დავიჭირეთ ისინი საკუთარ შეცდომაზე, როცა არ აპირებდნენ ამის დარეგისტრირებას და ამაზე კენჭისყრას და აპირებდნენ, დაებრალებინათ ეს ოპოზიიცისთვის, ჩვენ ვუთხარით რომ გექნებათ ხმები, მაგრამ მერე თქვეს, რომ ეს რა არის, ჯერ შემოდით და მერე ვიმსჯელოთ. შესვლას არ ვაპირებთ, ჩვენ მომავლის კენჭისყრაში მონაწილეობას ვაპირებთ", — განაცხადა მან პალიტრანიუსის ეთერში.

მისი თქმით, თუ ხელისუფლება აიძულეს, რომ დაარეგისტრირონ ეს ცვლილება, ხმას საკმარისი ოპოზიციონერი მისცემს,.

"მე დარწმუნებული ვარ, ვარაუდის კი არა მაქვს, იმედს კი არ გამოვთქვამ, დარწმუნებული ვარ, რომ საკმარისზე მეტი რაოდენობის ოპოზიციონერი დეპუტატი მისცემს ხმას ერთჯერადად, მომავლის კანონპროექტს", — განაცხადა მან.

10 თებერვალს, რესპუბლიკური პარტიის ლიდერმა, ხათუნა სამნიძემ განაცხადა, რომ თუ უბარიერო პროპორციული არჩევნების კანონპროექტი დარეგისტრირდებოდა, ერთი დღით პარლამენტში შევიდოდნენ და კენჭისყრაში მონაწილეობას მიიღებდნენ. ქართული ოცნების ერთ-ერთმა ლიდერმა, მამუკა მდინარაძემ ამას ბავშვური საქციელი უწოდა.

პასუხად სამნიძემ განაცხადა, რომ მმართველ გუნდს სულ შანტაჟი არ გაუვა.

"ჯერ შემოდითო გვაშანტაჟებს, კანონპროექტი დადეთ ჯერ და ხმა გექნება-მეთქი და პასუხად მივიღეთ, რა დროს ეგაა პრობლემებია ქვეყანაშიო. გაბედეთ კანონპროექტის დარეგისტრირება! სულ შანტაჟი არ გაგივათ", — წერდა ის.

11 თებერვალს რესპუბლიკური პარტიის ერთ-ერთმა ლიდერმა, თამარ კორძაიამ განაცხადა, რომ პროპორციული კენჭისყრის მხარდასაჭერად საპარლამენტო მანდატის გამოყენების თემა უკვე "ამოიწურა", რადგან ქართული ოცნებაც კი არ წავიდა არანაირ კომპრომისზე.

"ინიციატივის ერთ-ერთი მნიშვნელოვანი კომპონენტი იყო პოლიტიკური პარტიების საერთო თანხმობის შემთხვევაში ამის გაკეთება. პოლიტიკურმა პარტიებმა გამოხატეს თავიანთი პოზიცია, რომ ისინი, მხოლოდ და მხოლოდ, ვადამდელი არჩევნებისა და საარჩევნო კანონმდებლობის ცვლილებების ფარგლებში არიან მზად, შევიდნენ და ხმა მისცენ. შესაბამისად ვფიქრობთ, თემა უკვე ამოიწურა და ამ ფორმით, ამ საკითხზე საუბარი რთული იქნება, პირველ რიგში იმიტომ, რომ ქართული ოცნებაც კი არ წამოვიდა არანაირ კომპრომისზე", — განაცხადა მან.

ამავე თემაზე:

• პარლამენტი ერთჯერადი გამოყენების არ არის — ხუნდაძე რესპუბლიკელების ინიციატივაზე
• ეს არის ძალიან გაბედული და, რაც მთავარია, სახელმწიფოებრივად სწორი პოზიცია — იოსელიანი რესპუბლიკელების ინიციატივაზე
• გაუგებარია, ერთი მხრივ იყო ბოიკოტში და მეორე მხრივ, რამდენიმე დღით შეხვიდე პარლამენტში — ხაზარაძე სამნიძეზე
• მნიშვნელოვანი საკითხის მოგვარებისთვის, შესაძლოა, მოგვიწიოს ერთი კენჭისყრისთვის შესვლა — ახვლედიანი რესპუბლიკელების ინიციატივაზე