პარტნიორობა ადამიანის უფლებებისთვის იურისტი, ანა თავხელიძე On.ge-სთან ამბობს, რომ ქობულეთში სექსუალური ძალადობის შემდეგ ბავშვის თვითმკვლელობის საქმეზე კითხვის ნიშნები არსებობს შინაგან საქმეთა სამინისტროს რეაგირების თვალსაზრისით. მისი განცხადებით, წარმოუდგენელია, რომ სავარაუდო მოძალადე მაშინვე არ დააკავეს ან მის მიმართ შესაბამისი შემზღუდავი ღონისძიებები არ გამოიყენეს.

"პირველ რიგში, ახლა რა ინფორმაციაც გვაქვს, ცალსახა არის შინაგან საქმეთა სამინისტროს არაეფექტური რეაგირება. ზოგადად, ბავშვის მიმართ ძალადობის და განსაკუთრებით, სექსუალური ძალადობის საქმეებზე გადამწყვეტი არის სახელმწიფოს სწრაფი რეაგირება, წარმოუდგენელია, რომ რამდენიმე თვის განმავლობაში შინაგან საქმეთა სამინისტრომ არ დააკავა სავარაუდო მოძალადე და მის მიმართ შემზღუდავი ღონისძიება არ გამოიყენა, თუნდაც პროკურატურამ და სახელმწიფო უწყებებმა. ამის მიზეზი შეიძლება იყოს, რომ ბავშვის ასაკიდან გამომდინარე მას უბრალოდ არ დაუჯერეს. ეს არ არის პირველი შემთხვევა, როდესაც ბავშვებს არ უჯერებენ. ფაქტია, რომ შინაგან საქმეთა სამინისტრომ გამოძიება გააჭიანურა და მყისიერი რეაგირება არ განახორციელა", — ამბობს იგი.

თავხელიძის განცხადებით, ასევე კითხვის ნიშნებია სოცმუშაკების რეაგირების მხრივაც. მისი თქმით, აუცილებელია შეისწავლონ ყველა შესაბამისი უწყების პასუხისმგებლობის საკითხი და საჭიროების შემთხვევაში შესაბამისი ზომები გაატარონ.

"ასევე, მეორე საკითხი არის, როგორც კი შეტყობინება შევიდა პოლიციაში, ჩართეს თუ არა ყველა შესაძლო უწყება, რომელსაც რაიმე რაიმე შემხებლობა აქვს ბავშვთან დაკავშირებით და გადაწყვეტილების მიღება ევალება. მაგალითად, ასეთია სოციალური მუშაკი. მნიშვნელოვანია, მუშაობდა თუ არა ძალადობის თემაზე, რადგან გაჟღერდა ინფორმაცია, რომ ზოგადად კი მუშაობდა სოციალური მუშაკი, მაგრამ იმის გამო, რომ ბავშვს არ ჰყავდა მშობლები და ასე შემდეგ, თუმცა ეს ინფორმაცია დაზუსტებით არ ვიცით ჩვენ. ძალადობის თემაზე თუ მუშაობდა სოციალური მუშაკი, რატომ არ იყო ფსიქოლოგი ბავშვთან? ეს არის წარმოუდგენელი ამბავი, რომ 13 წლის ბავშვი გახდა სექსუალური ძალადობის მსხვერპლი და მასთან ფსიქოლოგი არ მუშაობს", — განაცხადა მან.

იურისტის თქმით, სახელმწიფოს ყველა შესაძლო ზომა უნდა მიეღო და ყველა შესაბამისი პირი უნდა ჩაერთო საქმეში, რომ ეს შედეგი თავიდან აეცილებინათ.

"ამის თავიდან აცილება შეიძლებოდა. თუ ყველა სახელმწიფო უწყება, პოლიცია, სოციალური სამსახური თავის საქმეს გააკეთებდა, ეს შედეგი არ დადგებოდა. წარმოუდგენელია ეს, რომ ბავშვის ემოციური მდგომარეობა, ეს მიზეზები, რამაც შეიძლება ბავშვი ამ გადაწყვეტილებამდე მიიყვანოს, ეს მხედველობიდან გამორჩენოდა სოციალურ მუშაკს. ამიტომ, რა თქმა უნდა, მასთანაც სახელმწიფოს უნდა ჰქონდეს კითხვები და ჩვენ მოვითხოვთ იმას, რომ ყველა სოცმუშაკის, მათ შორის, პოლიციელის პასუხისმგებლობის შესწავლა დაიწყოს", — თქვა მან.

დღეს შინაგან საქმეთა სამინისტრომ გაავრცელა ინფორმაცია, რომ ქობულეთში 24 წლის კაცი დააკავეს, რომელმაც 16 წლამდე ბავშვთან სქესობრივი კავშირი დაამყარა. არსებული ინფორმაციით, ბავშვი 14 წლის გოგოა, რომელმაც გუშინ თავი მოიკლა. აღსანიშნავია, რომ როცა მედიაში ბავშვის თვითმკვლელობის შესახებ ინფორმაცია გავრცელდა, შსს სავარაუდო სექსუალურ ძალადობას არ ადასტურებდა. დღეს გავრცელებულ განცხადებაში კი, სადაც მოძალადის დაკავებაზეა საუბარი, ასევე არაფერია ნათქვამი თვითმკვლელობაზე.