ტყიბულის შახტის ერთ-ერთი დასაქმებული ამბობს, რომ კოლეგებთან, რომლებიც პროტესტის ნიშნად შახტიდან არ ამოდიან, საჭმელი არ გააგზავნინეს.

"ვერ ვეკონტაქტებით ვერავის. შახტში არიან მეშახტეები, საჭმლის გაგზავნა გვინდოდა, გამზადებულია საჭმელი და უფლება არ მისცეს. დაავალეს დაცვას, არავითარი საჭმელი არ გააგზავნოთო. შეიძლება სხვა პირობებიც მოგვთხოვონ მერეო, დისკოთეკაო. ასეთი ცინიკური რაღაცები თქვეს", — აღნიშნავს ერთ-ერთი მეშახტე ჟურნალისტებთან.

საკვებთან დაკავშირებით საქნახშირის განცხადებაში წერია, რომ თანამშრომლებს სასადილოთი სარგებლობა არ ეზღუდებათ და სურვილის შემთხვევაში, საკვების მიღების შემდეგ, შეუძლიათ უკან დაბრუნდნენ.

ტყიბულში, ძიძიგურის სახელობის შახტის 9 მუშა პროტესტის ნიშნად შახტიდან არ ამოდის. ისინი კომპანიის მხრიდან განახევრებული ხელფასების დარიცხვას აპროტესტებენ.

"არასწორი დაგეგმარება იყო. გეგმა მოგვცეს ძალიან ზედმეტი [გეგმა]. შემდეგ ეს გეგმა ვერ შევასრულეთ. გაზი იყო და ვერ შევდიოდით სამუშაო ადგილზე, გაგვაცდინა ამან", — ამბობს ერთ-ერთი მეშახტე.

პროფკავშირების წარმომადგენლის, თამაზ დოლაბერიძის თქმით, იანვარში დაგეგმილზე ნაკლები ქვანახშირის მოპოვების გამო, მეშახტეებს კომპანიამ ნაკლები ხელფასი დაუანგარიშა, რასაც დასაქმებულების პროტესტი მოჰყვა.

პროფკავშირში საქნახშირის ამ მიდგომას არასწორს უწოდებენ და აცხადებენ, რომ კომპანიის მხრიდან არ მომხდარა შეფასება, რამ გამოიწვია გეგმის არ შესრულება.

კომპანია საქნახშირში დასაქმებულების პროტესტს გაურკვეველს უწოდებენ. მათი მტკიცებით, N4 ნახშირმომპოვებელი უბნის თანამშრომლები გაურკვეველი მიზეზით, შახტიდან ამოსვლაზე უარს აცხადებენ, რამაც, როგორც კომპანია ირწმუნება, უსაფრთხოების წესების უხეში დარღვევა და ავარიული სიტუაცია გამოიწვია.

აღსანიშნავია, რომ ტყიბულის შახტში დასაქმებულები ადგილზე არსებულ სამუშაო პირობებს ხშირად აპროტესტებენ. გასული წლის მარტში სამსახურებრივი მოვალეობის შესრულების დროს, 5 მეშახტე მოიწამლა. მეშახტეები მოწამვლას ძიძიგურისა და მინდელის სახელობის შახტების დამაკავშირებელ გვირაბში დაგროვილ მხუთავ აირებს უკავშირებდნენ.