ყველა ახალი სერიალის ყურებას იმ იმედით ვიწყებთ, რომ უცნობ პერსონაჟებს გავიცნობთ, მათ განსხვავებულ ისტორიებს მივადევნებთ თვალს და ახალ ემოციებს მივიღებთ.

თუმცა, სატელევიზიო შოუების ყველაზე ერთგულმა მაყურებლებმა, რომლებიც ფეისბუქჯგუფში ერთი სერიაც და... იყრიან თავს, ყველაზე კარგად იციან, რომ ხშირად ასე სულაც არ ხდება: სერიალების შემოქმედები მეტწილად ერთნაირ ხრიკებს მიმართავენ და ამის გამო არაერთი მსგავსი დეტალია, რომელსაც სერიალების უმეტესობაში ვაწყდებით.

აი, ამის რამდენიმე მაგალითი, რომლებიც თავად მაყურებლებმა დაასახელეს:

1. ისტორიის ანტიგმირი უცებ კარგ პერსონაჟად გადაიქცევა, რადგან თურმე მასაც აქვს გული, რომელზეც დიდი დარდი აწევს

2. მთავარი გმირი მნიშვნელოვანი ვახშმის წინ რატომღაც იღებს გადაწყვეტილებას, რომ თავად მოამზადოს ყველაფერი, თუმცა, ცხადია, მხოლოდ გაზქურაში ხანძრის გაჩენას ახერხებს წარმატებულად

3. უცებ ტაქსიში ჩამჯდარი პერსონაჟი მძღოლს დაახლოებით შემდეგ ფრაზას ეუბნება: "სახლში წამიყვანე", "ოფისთან ჩამომსვი" და ა.შ. რა თქმა უნდა, მძღოლმაც ყოველთვის იცის, არსაიდან გამოჩენილი მგზავრის სახლი ან ოფისი სადაა

4. როცა ვიღაცას გადაუდებელ საქმეზე ურეკავენ და ის არ პასუხობს, თუ ხმოვან შეტყობინებას უტოვებენ, მაშინვე ვხვდებით, რომ ის ამას ვერასდროს მოისმენს ან უკვე ძალიან გვიანი იქნება

5. თუ რომელიმე პერსონაჟს შეხვედრაზე იბარებენ, სადაც პირადად უნდა გაუმხილონ უდიდესი საიდუმლო, მაშინ რომელიმეს ან ორივეს ერთად დაატყდება თავს კატაკლიზმები და სტიქიური უბედურებები, რათა ეს შეხვედრა არ შედგეს

6. ოჯახური ვახშმის სცენები არის ის ადგილი, სადაც ყველა წევრმა ერთმანეთს წარსულის ყველა ცოდვა უნდა გაუხსენოს და მიუხედავად საგულდაგულოდ მომზადებული კერძებისა, მადა წაიხდინონ

7. დეტექტიურ სერიალებში პირველად ვისზეც მიიტანენ ეჭვს, ის ყოველთვის უდანაშაულოა და ვინც მანამდე უცოდველი კრავი ჩანდა, ბოლოს პირსისხლიანი ბოროტმოქმედი აღმოჩნდება

8. როცა ვიღაცას კლავენ, მკვლელი რას აკეთებს? არა, არ გარბის ან იმალება: რაც მანამდე ხმა არ ამოუღია, ყველაფერს ერთად ამბობს, რომ ამასობაში იქნებ პოლიცია, მეზობლები, ჟურნალისტები და დაღუპულის შორეული ნათესავებიც მოვიდნენ და როგორმე დაიჭირონ

9. როცა ვიღაც სიკვდილის პირასაა და მნიშვნელოვანი საიდუმლო აქვს გასამხელი, მანამდე ჯერ მთელი დღე მის გვერდით მყოფი ძალიან დამწუხრებული კეთილისმყოფელი მას ამინდზე, ბავშვობის წლებსა და სამოთხის არსებობის თეორიებზეც შეიძლება ესაუბროს, მაგრამ როცა საქმე მთავარის თქმაზე მივა, სწორედ მაშინ გაუჭირდება მომაკვდავს სუნთქვა, ამოახველებს სისხლს, დაუბინდდება თვალები და დაიწყებს გაურკვეველ ჩურჩულს

10. ან კიდევ პირდაპირ იმის თქმის ნაცვლად, რომ ესა და ესაა მკვლელიო, უცებ იწყებს მომაკვდავი კროსვორდის აწყობას და გაურკვეველი მინიშნებების გაცემას: "სავსე მთვარე", "ვარდი", "დედა"...

11. თინეიჯერი სკოლას იცვლის — მორჩა, ეს უკვე მთავარი დრამაა როგორც ამ პერსონაჟისთვის, ისე მომავალი სკოლისთვის, რომელიც ახალ მოსწავლეს დამშეული ნადირივით ელის

12. როცა მოვლენები რადიკალურად იცვლება (ცუდად ან კარგად) და ბოლოს აღმოჩნდება, რომ უბრალოდ სიზმარი იყო