Waffles + Mochi - ასე ჰქვია ნეტფლიქსის ახალ კულინარიულ შოუს, რომლის პროდიუსერიც აშშ-ის ყოფილი პირველი ლედი, ყველასათვის საყვარელი მიშელ ობამაა. შოუს მთავარი ვარსკვლავი, მარიონეტებთან ერთად, თავად მიშელ ობამაა, რომელიც სუპერმარკეტის მეპატრონის როლს მოირგებს. პერსონაჟები მსოფლიოს კულინარიულ სამყაროში იმოგზაურებენ, აღმოაჩენენ ახალ ინგრედიენტებსა თუ რეცეპტებს და კერძების მომზადებასაც შეეცდებიან. მიშელ ობამას ახალი პროექტის ხილვა ნეტფლიქსის მაყურებლებს 16 მარტიდან შეეძლებათ.

"ახალი მეგობრული სახეების დახმარებით, როგორებიც არიან სუპერმარკეტის მეპატრონე ქალბატონი ობამა და გმირების გზამკვლევი ჯადოსნური საყიდლების ურიკა, Waffles და Mochi მსოფლიო ინგრედიენტების აღმოსაჩენ მისიებზე გაემგზავრებიან. შემოივლიან მსოფლიოს სამზარეულოებს, რესტორნებს, ფერმებსა და სახლებს", — ნათქვამია ნეტფლიქსის განცხადებაში.

ახალი პროექტით თავად მიშელ ობამაც აღფრთოვანებულია. თავისი მოლოდინები გულშემატკივრებს ტვიტერზე გაუმხილა:

"აღფრთოვანებული ვარ, გაგიზიაროთ, რომ 16 მარტიდან ნეტფლიქსზე ახალ შოუს, სახელად Waffles + Mochi წარმოგიდგენთ. მიხარია, რომ ოჯახებსა და ბავშვებს შესაძლებლობა ექნებათ, შემოუერთდნენ ჩვენს თავგადასავლებს, რომლის ფარგლებშიც მსოფლიოს სხვადასხვა კერძებს აღმოვაჩენთ, მოვამზადებთ და დავაგემოვნებთ."

აღსანიშნავია, რომ ეს მიშელ ობამასა და ნეტფლიქსის პირველი კოლაბორაცია არაა. მიშელ და ბარაკ ობამების Higher Ground Productions ნეტფლიქსთან 2018 წლიდან თანამშრომლობს. თანამშრომლობის ფარგლებში, ნეტფლიქსზე, დოკუმენტური ფილმის Becoming ნახვაც შეგიძლიათ.