საქართველოს საზოგადოებრივი მაუწყებლის სამეურვეო საბჭოს წევრი, სულხან სალაძე აცხადებს, რომ ვასილ მაღლაფერიძის გეგმაზე, რომელიც ეხება მაუწყებლის რეფორმირებას, სამეურვეო საბჭო "ცოტა ხანში" გააკეთებს ოფიციალურ განცხადებას:

"ამ თემაზე გადაწყვეტილება მიღებული არ იქნება ერთ და ორ დღეში, დღეს საბჭო იტყვის, რომ ამ თემაზე დისკუსიას ხსნის და მოისმენს ყველა დაინტერესებული პირის მოსაზრებას, მათ შორის, თანამშრომლების მოსაზრებას. გადაწყვეტილება მიღებული იქნება ამ შეხვედრების შემდეგ. მე მაქვს შეკითხვები ამ თემაზე და შეკითხვების არსებობა ნიშნავს, რომ გადაწყვეტილების მისაღებად მჭირდება კითხვებზე პასუხების გაცემა.
აქ ბევრი საკითხია, არამხოლოდ წარმოდგენილი დოკუმენტები, არამედ, თანამშრომლებთან შრომითი ურთიერთობებიც".

საზოგადოებრივი მაუწყებლის გენერალურმა დირექტორმა, ვასილ მაღლაფერიძემ დღეს წარმოადგინა გეგმა, რომლის მიხედვითაც, მაუწყებელზე იგეგმება რეფორმა, კერძოდ, 2018 წლამდე უნდა შეჩერდეს ყველა გადაცემა მოამბის გარდა, უნდა მოხდეს თანამშრომელთა ოპტიმიზაცია და ტექნიკური გადაიარაღება.

მაღლაფერიძის გეგმა უნდა განიხილოს სამეურვეო საბჭომ, მის დამტკიცებამდე კი, დირექტორის თქმით, მაუწყებელი ჩვეულებრივ გააგრძელებს მუშაობას.