უკრაინის ელჩის, იგორ დოლგოვის კრიტიკას ექსპრეზიდენტი მიხეილ სააკაშვილიც კრიტიკითვე პასუხობს და მას "კორუმპირებულად", "სამარცხვინოდ" მოიხსენიებს. სააკაშვილის მტკიცებით, დოლგოვი უკრაინის ექსპრეზიდენტმა, პოროშენკომ ერთადერთ მიზნით "მის წინააღმდეგ" საბრძოლველად დანიშნა. მისივე თქმით, დოლგოვი აზიანებს უკრაინისა და საქართველოს იმიჯს პოსტსაბჭოთა ქვეყნებში.

სააკაშვილი ელჩს ადანაშაულებს საქართველოს საპარლამენტო არჩევნებზე უკრაინელი დამკვირვებლების ჩამოსვლის ხელისშეშლაში. მისი მტკიცებით, ელჩი ამაზე პოროშენკოს ჯგუფთან ერთად მუშაობდა.

ასევე, ექსპრეზიდენტი ელჩს საქართველოში დაკავებული უკრაინის მოქალაქეების საქმეზე უმოქმედობაშიც სდებს ბრალს და წერს: "ამის ფონზე ის ბედავს და მსგავს განცხადებებს აკეთებს".

"დღეს ის აგრესიული რიტორიკით დამესხა თავს იმის გამო, რომ ვიბრძვი ქართველი ხალხის თავისუფლებისთვის. თურმე, ეს აზიანებს უკრაინულ-ქართულ ურთიერთობებს. [...]

დოლგოვი მადანაშაულებს იმაში, რომ მე მოვუწოდებ ქართველ ხალხს პროტესტის გამოხატვისა და "უკანონო" დემონსტრაციებისკენ. და ეს ელჩი წარმოადგენს ქვეყანას, რომელმაც გადაიტანა 2 მაიდანი, რომელზეც უკრაინელმა ხალხმა გამოხატა თავისი პროტესტი გაყალბებულ არჩევნებზე?! ის ჩვეულებრივი საბჭოთა შემსრულებელია, რომელიც როგორღაც შეძვრა და პოსტმაიდანურ უკრაინელ მოხელეებში მოხვდა", — აცხადებს სააკაშვილი.

მისი თქმით, ელჩი უკრაინის ინტერესების საწინააღმდეგოდ მოქმედებს და მიაღწევს იმას, რომ "ასეთი ელჩები არც საქართველოს ჰყავდეს და არც უკრანას".

სააკაშვილი არამხოლოდ დოლგოვს, არამედ სხვა უკრაინელ დიპლომატებსაც ადანაშაულებს კორუმპირებულ ქმედებებში და აცხადებს, რომ ეს ხელს უწყობს მსოფლიოში უკრაინის პოზიციების შესუსტებას.

დღეს, 9 თებერვალს საგარეო საქმეთა სამინისტრომ გაავრცელა უკრაინის ელჩის კომენტარი, სადაც ის ამბობს, რომ მიხეილ სააკაშვილის მოწოდებები დაუმორჩილებლობაზე არ ეხმარება საქართველო-უკრაინის ორმხრივ ურთიერთობებს.

"სამწუხაროდ, კიდევ ერთხელ მიწევს იმ პირთა მიერ გაკეთებული განცხადებებზე კომენტარის გაკეთება, რომელნიც პირდაპირ არ არიან ჩართულნი საქართველო-უკრაინის ორმხრივ ურთიერთობებში. სამწუხაროდ, საქართველოს ყოფილი პრეზიდენტის მოწოდებები არ გვეხმარება ჩვენს ქვეყნებს შორის ნდობაზე დაფუძნებული ატმოსფეროს შენებასა და ორმხრივი ურთიერთობისა და სტრატეგიული პარტნიორობის განვითარების კუთხით.

ბუნებრივია, როგორც კონკრეტულ პირს, მას აქვს გამოხატვის უფლება. თუმცა ახლა, როდესაც პარლამენტსა და საპარლამენტო არჩევნებთან დაკავშირებული სიტუაცია მეტ-ნაკლებად დარეგულირდა და ფოკუსირება სხვა, მეტად მნიშვნელოვან საკითებზე ხდება, ვინაიდან სხვა ქვეყნებთან ერთად საქართველო და უკრაინა კოვიდ პანდემიის წინააღმდეგ იბრძვიან, ასეთი მოწოდებები დაუმორჩილებლობასთან და კანონსაწინააღმდეგო მანიფესტაციების გამართვასთან დაკავშირებით, ნამდვილად არ დაგვეხმარება. ეს არ დაეხმარება ქართველ ხალხს, მათ ერთიანობას და საქართველო-უკრაინის ორმხრივ ურთიერთობებს", — განაცხადა მან საგარეო საქმეთა სამინისტროში შეხვედრის შემდეგ.

დოლგოვმა იმედი გამოთქვა, რომ სააკაშვილის განცხადებები ორი ქვეყნის ურთიერთობას არ დააზიანებს.

8 თებერვალს ექსპრეზიდენტმა, მიხეილ სააკაშვილმა დაპოსტა, რომ დაუმორჩილებლობის აქცია არის "პირველი მერცხალი" იმისა, რაც აუცილებლად არის გასაკეთებელი ქეყანაში. მისი თქმით, მოსახლეობა არ დაემორჩილება შეზღუდვებს, ჯარიმებსა და სასამართლო გადაწყვეტილებებს, რომლებიც მხოლოდ მმართველი გუნდის სასარგებლოდაა.