საზოგადოებრივი მაუწყებლის გენერალურ დირექტორს, ვასილ მაღლაფერიძეს, პრესკონფერენციაზე, რომელზეც ის სამწლიან სამოქმედო გეგმას განიხილავს, On.ge-ს ჟურნალისტმა გელა ბოჩიკაშვილმა რამდენიმე კითხვა დაუსვა.

კითხვები შეეხებოდა რეფორმებს და იმას, თუ რამდენად შეძლებდა არხი ამ ცვლილებების ფარგლებში საზოგადოებისთვის ნეიტრალური ინფორმაციის მიწოდებას.

თქვენ თქვით, რომ საზოგადოებრივი მაუწყებლის ფუნქცია იყოს ნეიტრალური და მას არ აქვს, შეიძლება არ ჰქონდეს, სხვა მიზნები. როდესაც თქვენ ასე აფასებთ საზოგადოებრივი მაუწყებლის მუშაობას, თუ ამ გეგმას დაამტკიცებს სამეურვეო საბჭო, რამდენად წარმოგიდგენიათ, არჩევნების პერიოდში არ გავიდეს არცერთი გადაცემა გარდა საინფორმაციო გამოშვებისა?

წელს ასევე დაგეგმილია საკონსტიტუციო ცვლილებები. რამდენად წარმოგიდგენიათ საზოგადოებამ არ მიიღოს საზოგადოებრივი მაუწყებლიდან როგორც თქვენ თქვით ნეიტრალური ინფორმაცია?

რამდენად შეასრულებთ თქვენ სამაუწყებლო პრიორიტეტებს და ამ გადაცემების შეჩერებით, ღირს თუ არა ტექნიკური გადაიარაღება იმად, რომ 1 წლის განმავლობაში საზოგადოებას არ ჰქონდეს დაბალანსებული ინფორმაცია საზოგადოებრივი მაუწყებლიდან?

არასამთავრობოების შეფასებით, დღეს მედია გარემო არის პოლარიზებული და არსებობს დავები არხების მიმართ, როგორ წარმოგიდგენიათ საზოგადოებრივი მაუწყებელი მხოლოდ საინფორმაციო გამოშვებით?

აღნიშნულ თემებზე ვასილ მაღლაფერიძემ პასუხის გაცემა საზოგადოებრივი მაუწყებლის ახალი და მიმდინარე ამბების ბლოკის დირექტორს, გიორგი გვიმრაძეს, სთხოვა.

"რეალურად თუ შევხედავთ იმ მონაცემებს, რა მონაცემებიც გვაქვს, და თუნდაც იმას, რაც წინა წელს დაიდო, კვლევები ამასთან დაკავშირებით, ჩვენ შეგვიძლია ვთქვათ, რომ ყველაზე რეიტინგულ და ყველაზე დაბალანსებულ პროდუქტს ვტოვებთ. ასე რომ ვთქვათ. ასე შევხედოთ.

ცხადია, საინფორმაციო გამოშვება წინა წლის არჩევნების შეფასებით იყო ყველაზე დაბალანსებული და ყველაზე მიუკერძოებელი პროდუქტი, და მას ყველაზე მაღალი რეიტინგი ჰქონდა. შესაბამისად, ჩვენ იმ პროდუქტს ვტოვებთ ზუსტად აი ამ პერიოდში და ზუსტად მაგ მოტივაციის გათვალისწინებით, რომელიც თქვენ თქვით, თუმცა მართალი გითხრათ, გულწრფელად გეუბნებით, უფრო სხვა კითხვას ველოდი, ვიდრე მაგას, რომელიც თქვენ დამისვით. საბოლოო ჯამში ესეთი საზოგადოებრივი მაუწყებელი რა ტიპის მოთამაშეა, აი ამ მოედანზე, რომელშიც ვართ, გაუგებარია საბოლოო ჯამში".

თქვენს გუნდში არიან წინა მენეჯმენტის წარმომადგენლებიც, რომლებსაც ჰქონდათ ხედვა, რომ მულტიმედიური უნდა გამხდარიყო საზოგადოებრივი მაუწყებლის პლატფორმა. თუ გაიზიარეს და თუ გაეცანით იმ ხედვას, რაც ჰქონდათ, როგორ გეგმავდნენ ისინი ზუსტად ამ ტექნიკით და ისე, რომ გადაცემები არ უნდა შეეჩერებინათ? მაშინ არ იყო გადაცემის შეჩერებაზე საუბარი.

აღნიშნულ კითხვას საზოგადოებრივი მაუწყებლის პრესსამსახურის უფროსმა თიკო ბერძენიშვილმა უპასუხა:

"გარდაქმნის რეფორმა დღეს არ დაიწყო და სწორედ 2016 წლიდან დაიწყო ჩვენმა მენეჯმენტმა ამაზე საუბარი. არაერთხელ ვისაუბრეთ იმ მდგომარეობაზე, რომელიც ტექნიკურად ცხადია ვიცოდით და ეს ახალი ჩვენთვის არ იყო, მოსალოდნელი იყო და გარდაუვალი იქნებოდა ამ რეფორმის გატარება. ვეცადეთ 2016 წელს ჩაგვეშვა ბადეში ცოტა მეტი გადაცემა და პრინციპში ვცადეთ ტელევიზიის გადარჩენა რადიკალური რეფორმის გარეშე, თუმცა ვხედავთ, რომ ეს შეუძლებელია. დავრჩით იმ რეიტინგზე, რაც გვქონდა და ტექნიკური პრობლემებიც არ გამოსწორებულა".

საზოგადოებრივი მაუწყებლის ახალმა გენერალურმა დირექტორმა ვასილ მაღლაფერიძემ დღეს განაცხადა, რომ გეგმავს 2018 წლამდე არხის ეთერში მხოლოდ მოამბე დარჩეს. რეალური სივრცისა და სხვა გადაცემების დახურვის შესახებ ინფორმაცია წინა კვირაში გავრცელდა.