ქართული ოცნების დროებითი საგამოძიებო კომისიის სხდომაზე ოცნების დეპუტატი გივი მიქანაძე და ოცნების ხელისუფლების საგარეო საქმეთა მინისტრი, მაკა ბოჭორიშვილი არიან დაბარებულები. კომისიის ინფორმაციით, დღევანდელ სხდომაზე "2012-2025 წლებში ზოგიერთი პოლიტიკოსის მხრიდან საქართველოს საგარეო პოლიტიკური მიზნების საზიანოდ განხორციელებული ქმედებები" განიხილება.

მიქანაძემ კომისიის სხდომაზე ევროპის საბჭოს საპარლამენტო ასამბლეაზე (PACE) ისაუბრა და განაცხადა, რომ 2024 წლის არჩევნების შემდეგ, საპარლამენტო ასამბლეაში მონაწილეობის სურვილი "რადიკალური ჯგუფების და არასამთავრობო სექტორის წარმომადგენლებისგან" მაღალი იყო. ოცნების დეპუტატის განმარტებით, ზემოხსენებული პირები ოფიციალურად არ იყვნენ მიწვეულნი და ისინი სტუმრის სტატუსით იმყოფებოდნენ.

გივი მიქანაძემ სხდომაზე დაასახელა ოპოზიციური პარტიის და არასამთავრობო ორგანიზაციების წარმომადგენლები, რომელთა "მთავარი მიზანი იყო, რომ საქართველოს პარლამენტის ახლად არჩეული დელეგაციის უფლებამოსილება არ ყოფილიყო ცნობილი" ევროსაბჭოში და საქართველოს "იმიჯისთვის ზიანი მოეტანათ". ოცნების დეპუტატმა თავისი მოსაზრება იმ არგუმენტით ახსნა, რომ პოლიტიკოსების ნაწილი ევროპის საბჭოს საპარლამენტო ასამბლეის პრეზიდენტსა და ასამბლეის გენერალურ მდივანს შეხვდა, "სადაც ისინი კატეგორიულად აყენებდნენ საკითხს, რომ საქართველოს დელეგაციის უფლებამოსილება არ ყოფილიყო ცნობილი".

"მათი მთავარი მიზანი იყო, რომ საქართველოს პარლამენტის ახლად არჩეული დელეგაციის უფლებამოსილება არ ყოფილიყო ცნობილი და შესაბამისად, ამით ჩვენი ქვეყნისთვის და ქვეყნის იმიჯისთვის ზიანი მოეტანათ. ეს მათ არც დაუფარავთ იმიტომ, რომ კონკრეტული პოლიტიკოსები ღიად აცხადებდნენ, რომ მათი მიზანია, საქართველოს დელეგაციის უფლებამოსილება არ აღიაროს ევროპის საბჭოს საპარლამენტო ასამბლეამ.

პარტიებმა, რომლებმაც საპარლამენტო ბარიერი გადალახეს 2024 წლის არჩევნებზე, 4 პოლიტიკური ჯგუფის წარმომადგენლები აქტიურად ეკონტაქტებოდნენ [ევროპის] პოლიტიკურ ჯგუფებს იმისთვის, რომ საქართველოს დელეგაციის უფლებამოსილება არ ყოფილიყო ცნობილი. მათ გაგზავნეს სტრასბურგში დელეგაცია, რომლის შემადგენლობაში შედიოდნენ: თინა ბოკუჩავა, სალომე სამადაშვილი, გიორგი კანდელაკი, ზურაბ ჭიაბერაშვილი, ზურაბ-გირჩი ჯაფარიძე. არასამთავრობო სექტორიდან: ნინო დოლიძე, ნონა ქურდოვანიძე, გიორგი ბურჯანაძე, თინა ხიდაშელი და "საერთაშორისო გამჭვირვალობა — საქართველოს" წარმომადგენელი ონიანი. ეს ადამიანები მაქსიმალურად იყვნენ კომუნიკაციაში სხვადასხვა პოლიტიკურ ჯგუფთან და ინდივიდუალურ პოლიტიკოსებთან. ეს კომუნიკაციები ძირითადში ხდებოდა ევროპის საბჭოს საპარლამენტო ასამბლეის კორიდორებში, თუმცა რიგ პოლიტიკური ჯგუფების შეკრებაზე მოხდა მათი მიწვევაც, სადაც მათ სრულიად დეზინფორმაციის გაზიარების შესაძლებლობა მიეცათ. ამასთან, მათი მხრიდან აქტიური მუშაობა მიმდინარეობდა და ეს დასტურდება იმითაც, რომ პოლიტიკოსების ნაწილი შეხვდა ევროპის საბჭოს საპარლამენტო ასამბლეის პრეზიდენტსა და ასამბლეის გენერალურ მდივანს, სადაც ისინი კატეგორიულად აყენებდნენ საკითხს, რომ საქართველოს დელეგაციის უფლებამოსილება არ უნდა ყოფილიყო ცნობილი," — თქვა ოცნების წარმომადგენელმა.

მიქანაძემ დამატებით ისაუბრა ერთიანი ნაციონალური მოძრაობის ლიდერზე, თინა ბოკუჩავაზე. დეპუტატის განცხადებით, მონიტორინგის კომიტეტის სხდომას ოცნების დელეგაციის წარმომადგენელი და "არანაირი სამართლიანი საფუძვლით" — თინა ბოკუჩავაც იმყოფებოდა. მიქანაძეს თქმით, ბოკუჩავამ სხდომაზე "დეზინფორმაციული ხასიათის ინფორმაცია" გაავრცელა, რადგან ქართულ ოცნებას რუსული ხელისუფლება უწოდა და "უდიდესი შეურაცხყოფა იქნება ის, რომ თუნდაც დათქმით ცნოს საქართველოს მუდმივმოქმედი დელეგაციის უფლებამოსილება".

"ჩვენ ვხედავდით, რომ ის ადამიანები, რომლებიც დავასახელე, აქტიურობდნენ ამ კონტექსტში და მაქსიმალურად ყველაფერს აკეთებდნენ იმისთვის, რომ ამ მიზნისთვის მიეღწიათ. განსაკუთრებით ეს პოზიციონირება გამოიკვეთა მონიტორინგის კომიტეტის სხდომაზე, რომლის წევრიც არც მე და არც დელეგაციის ხელმძღვანელი არ ვიყავით, მაგრამ იქიდან გამომდინარე, რომ საკითხი საქართველოს ეხებოდა, დელეგაციამ მიიღო მოწვევა და დელეგაციის ხელმძღვანელი დაესწრო ამ კომიტეტის სხდომას. აღმოჩნდა, რომ არანაირი სამართლებრივი საფუძვლის არსებობის მიუხედავად, ამავე სხდომაზე მიწვეული იქნა თინა ბოკუჩავაც. დელეგაციის ხელმძღვანელს საშუალება ჰქონდა ჩვენი დელეგაციის პოზიცია დაეფიქსირებინა, თუმცა ამავდროულად მან მოისმინა ის სრულიად დეზინფორმაციული ხასიათის ინფორმაცია, რომელიც თინა ბოკუჩავამ გაჟღერა. ეს ადამიანი პირდაპირ ამბობდა, რომ საქართველოში არის რუსული ხელისუფლება, რომ საჭიროა ზომების მიღება და რომ ევროპის საბჭოს საპარლამენტოა ასამბლეისთვის უდიდესი შეურაცხყოფა იქნება ის, რომ თუნდაც დათქმით ცნოს საქართველოს მუდმივმოქმედი დელეგაციის უფლებამოსილება," — განაცხადა გივი მიქაძემ.