NATO-ს წევრი ქვეყნების ლიდერები ნიდერლანდებში სამიტზე შეიკრიბნენ, რათა სხვა საკითხებთან ერთად თავდაცვის ხარჯების გაზრდა განიხილონ.

2-დღიანი ღონისძიება სამშაბათს ჰააგაში დაიწყო. მეფე ვილჰემ-ალექსანდრემ პირველ დღეს ვახშამი გამართა, რომელსაც მსოფლიოს ლიდერებთან ერთად აშშ-ს პრეზიდენტი დონალდ ტრამპი და უკრაინის პრეზიდენტი ვოლოდიმირ ზელენსკი ესწრებოდნენ. როგორც საერთაშორისო მედია წერს, NATO-სთვის ეს შესაძლებლობაა, ხაზი გაუსვას უკრაინის მიმართ სოლიდარობას.

მოლოდინია, რომ ლიდერები შეთანხმდებიან, რომ ტრამპის მოწოდების საპასუხოდ, თავდაცვასთან დაკავშირებული ხარჯები მშპ-ს 5%-მდე გაიზრდება.

ტრამპი წლების განმავლობაში აკრიტიკებდა NATO-ს ალიანსს და ევროპელ მოკავშირეებს, რომ აშშ-ის თავდაცვის ხარჯების იყენებდნენ და ალიანსიდან აშშ-ის გაყვანის საკითხსაც კი აყენებდა.

ტრამპმა მოითხოვა, რომ მოკავშირეებმა თავდაცვაზე მთლიანი შიდა პროდუქტის (მშპ) 5%-მდე დახარჯონ, რაც 2014 წელს დადგენილ 2%-იან ნიშნულთან შედარებით უზარმაზარი ზრდაა.

ევროკავშირის საგარეო პოლიტიკის ხელმძღვანელმა კაია კალასმა რადიო თავისუფლებასთან ინტერვიუში განაცხადა, რომ ჰააგაში გამართული სამიტი ერთ და მხოლოდ ერთ თემას ეხება — თავდაცვაზე მეტი თანხის დახარჯვას და ხარჯების მშპ-ს 5%-მდე გაზრდას". მან დასძინა, რომ თუ ქვეყნები თავდაცვაზე მეტს ხარჯავენ, მათ ასევე შეუძლიათ გაზარდონ უკრაინის მხარდაჭერა.

კალასმა ხაზგასმით აღნიშნავს, რომ უკრაინის დახმარება რეალურად სასარგებლოა ჯგუფის უსაფრთხოებისთვის და აღნიშნა, რომ ევროკავშირმა წელს გასულ წელთან შედარებით გაზარდა უკრაინის მხარდაჭერა.

სამიტის ფარგლებში, ტრამპი უკრაინის პრეზიდენტ ვოლოდიმირ ზელენსკის შეხვდება, რათა უკრაინაში რუსეთის შემოჭრა განიხილონ.

ზელენსკიმ განაცხადა, რომ უკრაინას სურს აშშ-ის შეიარაღების, მათ შორის საჰაერო თავდაცვის სისტემების მნიშვნელოვანი შესყიდვები. ტრამპი უკრაინისთვის დახმარების შეწყვეტის დაპირებით იყრიდა კენჭს, თუმცა განაცხადა, რომ ღიაა ქვეყნისთვის იარაღის მიყიდვის შესაძლებლობისთვის.

ცნობისათვის, ოცნების ხელისუფლების წარმომადგენლები NATO-ს სამიტზე მიწვეული არ ყოფილან.

მთავრობის ადმინისტრაციას NATO-ს სამიტზე მოსაწვევი არ მიუღია

18 ივნისს ჟურნალისტებმა "ოცნების" პრემიერს ჰკითხეს, მიიღო თუ არა ადმინისტრაციამ სამიტზე მოსაწვევი, რაზეც კობახიძემ უთხრა რომ "ვერ იტყვის".

"რაც შეეხება ნატო-საქართველოს ურთიერთობებს, ხედავთ, როგორ ვითარდება მოვლენები ბოლო პერიოდის განმავლობაში. ნატო აცხადებს, რომ ისინი არც ახლო პერსპექტივაში და არც საშუალოვადიან პერსპექტივაში არ მსჯელობენ უკრაინისა და საქართველოს გაწევრიანებაზე, რაც არის ფაქტი და მოცემულობა. ვნახოთ, მომავალში როგორ განვითარდება მოვლენები", — განაცხადა კობახიძემ.