ლელოს წევრების, ირაკლი კუპრაძისა და თაზო დათუნაშვილის განცხადებით, დაუმორჩილებლობის ღამეს აქციის დროს ე.წ. კომენდანტის საათის დარღვევისთვის დააჯარიმეს.

"შსს ადგა და დედაჩემს ურეკავენ ბათუმში, თქვენმა შვილმა დანაშაული ჩაიდინა და მისი ტელეფონის ნომერი მოგვაწოდეთო. არაფერი იცოდა და გულგახეთქილმა დამირეკა. დამირეკეს და ხვალ პოლიციის დეპარტამენტში 16:00 საათზე ინდივიდუალურად განვიხილოთ თქვენი სამართალდარღვევის ოქმიო. დავთანხმდი და მივალ. ასეთი განხილვის პრეცედენტი არ მახსენდება ადმინისტრაციულ ჯარიმაზე", — წერს კუპრაძე ფეისბუქში.

თაზო დათუნაშვილის თქმით კი, დაუმორჩილებლობის აქციაში მონაწილეობისათვის 2 000 ლარით დააჯარიმეს.

"აი, ასე იქცევა შეშინებული ხელისუფლება. ჩვენ მხარეს არის სიმართლე და ამ სიმართლისათვის ვიბრძოლებთ ბოლომდე. ბოლომდე ვიბრძოლებთ ამ ანტიკონსტიტუციური და უაზრო რეგულაციების წინააღმდეგ, რომელიც მოქალაქეების ფუნდამენტურ უფლებებს არღვევს", — წერს დათუნაშვილის სოციალურ ქსელში.

აღნიშნულზე On.ge-მ შინაგან საქმეთა სამინისტროს მიმართა. უწყებაში ამ დრომდე კომენტარს არ აკეთებენ. მათ პასუხს მიღებისთანავე შემოგთავაზებთ.

მოძრაობა სირცხვილიას განცადებით, შსს-მ იმ მოქალაქეთა დაჯარიმება დაიწყო, რომლებიც 6 თებერვალს გამართულ დაუმორჩილებლობის მსვლელობაში მონაწილეობდნენ.

"იმ შემთხვევაში, თუ შსს-ს წარმომადგენელი დაგიკავშირდებათ და შეგატყობინებთ დაკისრებული ჯარიმის შესახებ, ან პოლიციის განყოფილებაში მისვლა გთხოვეს — აუცილებლად შეგვატყობინეთ, ვინაიდან სამართალდამცავების მიერ საპროტესტო აქციაში მონაწილე პირებისთვის 2000 ლარიანი სახდელის დაკისრება არის არაკონსტიტუციური, პოლიტიკურად მოტივირებული რეპრესიული აქტი, რომელიც შეკრება-მანიფესტაციის, სიტყვისა და გამოხატვის თავისუფლებას არღვევს", — აღნიშნავენ სირცხვილიაში.

თბილისში სამოქალაქო აქტივისტებმა და ბიზნესის სხვადასხვა სფეროს წარმომადგენლებმა ე.წ. დაუმორჩილებლობის აქცია, 7 თებერვალს, გამართეს. აქცია მიმდინარეობდა, ასევე, ბათუმშიც. მოქალაქეები კორონავირუსის გავრცელების პრევენციის მიზნით დაწესებულ შეზღუდვებს აპროტესტებდნენ და მოითხოვდნენ, როგორც კომენდანტის საათის მოხსნას, ასევე, სხვადასხვა ბიზნესის სფეროების სრულად აღდგენას.

აჭარაში აქციის 11 მონაწილე დააკავეს. მათ პოლიციის დაუმორჩილებლობას ედავებოდნენ. ბათუმში საპროტესტო აქციაზე დაკავებული 11 პირის სასამართლო პროცესიც გაიმართა. როგორც სასამართლოს პრესსამსახურში On.ge-ს განუცხადეს, 9 პირი 1 000-1 000 ლარით, ხოლო 2 დაკავებული 1 500-1 500 ლარით დააჯარიმეს.