დღეს, 5 თებერვალს, საზოგადოებრივი მაუწყებლის შენობასთან გადაცემა რეალური სივრცის მხარდასაჭერი აქციაზე რადენიმე ათეული ადამიანი შეიკრიბა. აქციის ორგანიზატორი მწვანე მუშტი იყო.

აქციის მონაწილეებმა გადაცემის შესაძლო დახურვა გააპროტესტეს და რეალური სივრცის გუნდს სოლიდარობა გამოუცხადეს.

ფოტო: თემო ბეჟანიძე / Facebook

მწვანე მუშტის წარმომადგენელმა და სამოქალაქო აქტივისტმა ირაკლი კუპრაძემ აქციის მონაწილეებს მიმართა და თქვა, რომ რეალური სივრცე უკვე 5 წელია გამორჩეული გადაცემაა. კუპრაძის თქმით, საზოგადოებრივი მაუწყებელი, რომელიც ფუნქციონირებს ჩვენს მიერ გადახდილი ფინანსებით სრულიად უნდა იყოს ორიენტირებული საზოგადოებრივ ინტერესებსა და საჯარო სიკეთეებზე:

"ჩვენ გვჭირდება ის გადაცემა, რომელიც უკვე 5 წლის განმავლობაში აშუქებს სოციალურ პრობლემებს. ეს იყო საყდრისის მოძრაობა; მუშათა მოძრაობები და გაფიცვები; ეს იყო გარემოსდაცვითი, ეკოლოგიური პრობლემები; ეს იყო ურბანული პრობლემები თბილისის გარშემო; ეს იყო აჭარის და სვანეთის ჰესების პრობლემები; გენდერული, ქალთა პრობლემები. ეს გადაცემა არის ერთ-ერთი ყველაზე გამორჩეული, რომელიც პოლიტიკურ სივრცეში სამოქალაქო აქტივისტებს გვაძლევს საშუალებას პოლიტიკური ელიტების მიღმა დავსხდეთ და ოპონირება გავუწიოთ ხელისუფლებას და ოპოზიციას. რეალური სივრცე უნდა შენარჩუნდეს. საზოგადოებრივი მაუწყებელი, რომელიც ფუნქციონირებს ჩვენს მიერ გადახდილი ფინანსებით სრულიად უნდა იყოს ორიენტირებული საზოგადოების დაკვეთაზე, საზოგადოებრივ ინტერესებზე, საჯარო სიკეთეებზე და არა ეპატაჟსა და რეიტინგზე."

აქციის მონაწილეებს მიმართა რეალური სივრცის ავტორმა და წამყვანმა, ნინო ზაუტაშვილმა. მისი თქმით, ის მზადაა იბრძოლოს, რომ გადაცემამ გააგრძელოს მუშაობა:

"ხვალ 12 საათის მერე გაირკვევა, ჩვენ რა რეჟიმში ვიმუშავებთ თქვენთვის და ერთმანეთისთვის. მე ვარ სრულიად საბრძოლო განწყობაზე, რომ მივიყვანოთ ეს საქმე ბოლომდე, რომ რეალურმა სივრცემ გააგრძელოს მუშაობა რეალური ადამიანებისთვის და რეალური მდგომარეობის გამოსასწორებლად ამ ქვეყანაში. ყველაფერს გავაკეთებ. ჩვენი გუნდი ყველაფერს გააკეთებს, რომ არ ჩამოვრჩეთ იმ მთავარ მოვლენებს, რომელიც იქნება ჩვენთვის ყველაზე აქტუალური. ძალიან მიყვარხართ ყველა. უღრმესი მადლობა."

გადაცემა რეალური სივრცის დახურვის, ასევე, მაუწყებლის სხვა საზოგადოებრივ-პოლიტიკური გადაცემების დახურვის და თანამშრომლების მასობრივი დათხოვნის შესახებ განცხადება, 3 თებერვალს, კოალიციამ მედიის ადვოკატირებისთვის გაავრცელა.

აღნიშნული ინფორმაცია, გუშინ, 4 თებერვალს არხის გენერალურმა დირექტორმა, ვასილ მაღლაფერიძემ უარყო. მაღლაფერიძის ცნობით, საზოგადოებრივი მაუწყებლის აღმასრულებელი საბჭო, ორშაბათს, 6 თებერვალს, 12 საათზე, პრესკონფერენციას გამართავს და საზოგადოებას თავის ხედვას გააცნობს მაუწყებლის მომავალთან დაკავშირებით.