პარლამენტის განათლების, მეცნიერებისა და კულტურის კომიტეტის თავმჯდომარე, თეა წულუკიანი აცხადებს, რომ მის მიერ მთავარი არხის დირექტორის, ნიკა გვარამიას ნომრის გასაჯაროება არის პოლიტიკური პაექრობის ნაწილი.

"ეს არის ჩვეულებრივი პოლიტიკური რიტორიკისა და პაექრობის ნაწილი. ეს არის ჩემი პროფესია", — განაცხადა თეა წულუკიანმა.

კითხვაზე, რა მოიტანა ამ ქმედებამ, წულუკიანი პასუხობს, რომ ის იყო შედეგიანი.

"მე ვფიქრობ, რომ შედეგიანია, იმიტომ, რომ მას შემდეგ ბატონი ნიკა გვარამია წკავწკავებს. ე.ი. შედეგიანი იყო", — განაცხადა თეა წულუკიანმა.

ეს განცხადებები თეა წულუკიანმა საქართველოში ევროკავშირის ელჩთან, კარლ ჰარცელთან შეხვედრის შემდეგ გააკეთა. ელჩი პარლამენტში თავად წულუკიანმა მიიწვია მას შემდეგ, რაც ჰარცელმა წულუკიანს მიერ ნიკა გვარამიას ნომრის პარლამენტის ტრიბუნიდან გამოცხადება არაეთიკურად შეაფასა.

"იგივე აზრზე ვარ", — განაცხადა კარლ ჰარცელმა წულუკიანთან შეხვედრის შემდეგ.

თეა წულუკიანმა ნიკა გვარამიას ტელეფონის ნომერი პარლამენტის სხდომაზე გაასაჯაროვა. სიტყვით გამოსვლისას წულუკიანმა პარტია მოქალაქეების ლიდერ ალეკო ელისაშვილს უთხრა, რომ მან "დემოკრატიის მაღალი სტანდარტი" აჩვენა, როცა ტელეფონის ნომერი გამოაცხადა და სურდა, თავისი ნომერიც ეთქვა. წულუკიანმა ურჩია ელისაშვილს ნომერი ჩაეწერა და მერე განაცხადა, რომ ეს არა მისი, არამედ ნიკა გვარამიას ნომერი იყო და ელისაშვილს ურჩია, მისთვის დაერეკა.

ნომრის გასაჯაროების შემდეგ, ნიკა გვარამიამ თქვა, რომ მასთან უცნობი ადამიანების ზარები არ წყდება. მან, სახალხო დამცველს, ნინო ლომჯარიას მიმართა, რათა აღნიშნულ ფაქტს გამოეხმაუროს და დაადგინოს, მისი პირადი ინფორმაციის გასაჯაროება უფლებრივად, რამდენად სწორია.

ნომრის გასაჯაროების საკითხს სახელმწიფო ინსპექტორის სამსახური შეისწავლის. უწყებაში აცხადებენ, რომ პერსონალურ მონაცემთა დაცვის შესახებ კანონის მიზანი ადამიანის პერსონალური მონაცემებისა და პირადი ცხოვრების დაცვაა.

საერთაშორისო გამჭვირვალობა — საქართველოს შეფასებით, წულუკიანმა არა მხოლოდ დაარღვია პერსონალური ინფორმაციის დამუშავების პრინციპი, არამედ კიდევ ერთხელ წაახალისა ნეგატიური კამპანია კრიტიკული მედიის ხელმძღვანელის წინააღმდეგ

გაიგეთ მეტი: