ამერიკის შეერთებული შტატების პრეზიდენტმა, ჯო ბაიდენმა წინამორბედ დონალდ ტრამპის საიმიგრაციო პოლიტიკის გამკაცრების შესახებ სამი ბრძანება გააუქმა. ამერიკის ხმის ცნობით, ცვლილებები შეეხო შეერთებულ შტატებსა და მექსიკას შორის საზღვარზე თავშესაფრის მინიჭების, ლეგალური იმიგრაციის ზოგიერთ წესსა და არალეგალი ემიგრანტების ოჯახის გაერთიანების პოლიტიკას. მედიის ინფორმაციით, აშშ-ს ახლადარჩეულმა პრეზიდენტმა ცვლილებებს ხელი დღეს, 3 თებერვალს მოაწერია.

კიდევ ერთი ბრძანდებით, ბაიდენმა სამუშაო ჯგუფის შექმნის შესახებ განაცხადა, რომელიც საზღვრის უკანონოდ კვეთის დროს მიგრანტი ოჯახების გაერთიანებას ხელს შეუწყობს.

ბრძანებულებებზე ხელმოწერის შემდეგ ბაიდენმა ჟურნალისტებთან განმარტა, რატომ აწერს ხელს განკარგულებებს პრეზიდენტობის პირველ დღეებში. მისი თქმით, ამით ის ცდილობს, წინა ადმინისტრაციის მიერ გატარებული "ცუდი პოლიტიკა" რაც შეიძლება სწრაფად აღმოფხვრას.

ბაიდენმა აღნიშნა, რომ აშშ-ს წინა პრეზიდენტის მიერ გაცემული ბრძანებულებები, ამერიკის უსაფრთხოებისთვის, განსაკუთრებით, საიმიგრაციო მიმართულებით კონტრპროდუქტიული იყო.

"როდესაც ჩვენ გვექნება სამართლიანი, მოწესრიგებული და ჰუმანური საემიგრაციო იურიდიული სისტემა, ამერიკა უფრო უსაფრთხო, ძლიერი და მდიდარი გახდება... დღეს ჩვენ წინა ადმინისტრაციის მორალური და ეროვნული სირცხვილის აღმოსაფხვრელად ვიწყებთ მუშაობას", — განაცხადა ბაიდენმა.

25 თებერვალს ბაიდენმა სამხედრო სამსახურში ტრანსგენდერი ადამიანების მიღებაზე დაწესებული აკრძალვაც გააუქმა.