სამხედრო გადატრიალების შემდეგ პოლიციამ ქვეყნის ფაქტობრივ ლიდერს, აუნ სან სუ ჩის ბრალი წაუყენა. პოლიციის დოკუმენტების თანახმად, ის შინაპატიმრობაში 15 თებერვლამდე იქნება.

როგორც BBC წერს, მისთვის წაყენებული ბრალი ითვალისწინებს იმპორტისა და ექსპორტის კანონის დარღვევას, ასევე კომუნიკაციისთვის უკანონო აპარატების ფლობას. დოკუმენტებში ნათქვამია, რომ აუნ სან სუ ჩიმ კომუნიკაციისთვის უკანონოდ შემოიტანა და იყენებდა რაციას, რომელიც მის რეზიდენციაში იპოვეს.

მისი ადგილსამყოფელი ამ დრომდე უცნობია, თუმცა ვრცელდება ინფორმაცია, რომ ის დედაქალაქში, თავის რეზიდენციაში იმყოფება.

ბრალი აქვს წარდგენილი დაკავებულ პრეზიდენტ ვინ მინს. მას პანდემიის დროს შეკრებას ედავებიან, კერძოდ, რომ საარჩევნო კამპანიის დროს ის მოსახლეობას ხვდებოდა

მიანმარში სამხედრო გადატრიალება მოხდა. პირველი თებერვლის დილით სამხედროებმა მმართველი პარტიის ლიდერი და ქვეყნის ფაქტობრივი ლიდერი აუნ სან სუ ჩი, პრეზიდენტი და სხვა პოლიტიკური ლიდერები დააკავეს.

ქვეყანაში ერთი წლის ვადით საგანგებო მდგომარეობა გამოაცხადეს. განცხადების თანახმად, რომელსაც ხელი ვიცე-პრეზიდენტმა მოაწერა, ხელისუფლება სამხედრო ძალების მთავარსარდალს მინ აუნ ჰლაინგს გადაეცა.

ბოლო თვეების განმავლობაში ხელისუფლებასა და არმიას შორის ურთიერთობა დაიძაბა მას შემდეგ, რაც ამ უკანასკნელებმა ნოემბერში ჩატარებული არჩევნების გამო უკმაყოფილება გამოთქვეს და გაყალბებულად მიიჩნიეს. აღნიშნულ არჩევნებზე აუნ სან სუ ჩის პარტია დემოკრატიის ეროვნულმა ლიგამ მთავრობის ჩამოყალიბებისთვის პარლამენტში საკმარისი მანდატები მოიპოვა.

სამხედროებმა შედეგები უზენაეს სასამართლოში გაასაჩივრეს და პრეზიდენტსა და საარჩევნო კომიტეტის თავმჯდომარეს უჩივლეს. გადატრიალების მოწყობის საშიშროებამა შემდეგ გაჩნდა, რაც სამხედროებმა სავარაუდო თაღლითობის გამო ზომების მიღებით დაიმუქრნენ.

აუნ სან სუ ჩი მიანმარელი სამოქალაქო აქტივისტი იყო, რომელმაც 1989 წლიდან 2010 წლამდე შინაპატიმრობაში გაატარა. ის ადამიანის უფლებების მოწინავე დამცველად მიიჩნეოდა, რის გამოც 1991 წელს ნობელის პრემიითაც დაჯილდოვდა.

2015 წელს მისმა პარტიამ დამაჯერებლად გაიმარჯვა ბოლო 25 წლის განმავლობაში მიანმარის პირველ ღია არჩევნებზე. ქვეყნის კონსტიტუცია მას უკრძალავს პრეზიდენტი გახდეს, რადგან მისი შვილები უცხო ქვეყნის მოქალაქეები არიან, მაგრამ ის მიანმარის ფაქტობრივ მმართველად მიიჩნევა.

როჰინჯი მუსლიმების მდგომარეობის გამო კი აუნ სან სუ ჩის მმართველობამ არაერთი კრიტიკა დაიმსახურა. 2017 წელს სამხედროების მხრიდან რეპრესიის გამო ათი ათასობით როჰინჯი მუსლიმი მეზობელ ბანგლადეშში გაიქცა.

აუნ სან სუ ჩის ყოფილი მოკავშირეები და მხარდამჭერები ადანაშაულებდნენ იმაში, რომ მან არაფერი გააკეთა ძალადობის, მკვლელობებისა და სავარაუდო გენოციდის შესაჩერებლად, ამასთან, უარი თქვა ეღიარებინა სასტიკი მოპყრობა და სამხედროები გაესამართლებინა.