მთავარი არხის დამფუძნებლის, ნიკა გვარამიას განცხადებით, ქართული ოცნების დეპუტატის, თეა წულუკიანის მიერ მისი ტელეფონის ნომრის გასაჯაროების შემდეგ, უცნობი ადამიანების ზარები არ წყდება. ის, სახალხო დამცველს, ნინო ლომჯარიას მიმართავს, აღნიშნულ ფაქტს გამოეხმაუროს და დაადგინოს, მისი პირადი ინფორმაციის გასაჯაროება უფლებრივად, რამდენად სწორია.

"ახლა გასაგებია, რატომ განახლდა მხოლოდ ჩემი პროცესი და რატომ ეჩქარებათ ჩემი იზოლაცია — როგორც აღმოჩნდა, მე არ ვუშვებ ოპოზიციას პარლამენტში, აი, ასე, მონებად მყავს. დღეს სამზე პროცესი მაქვს და ერთი საათით ადრე არ ჩერდება ჩემი ტელეფონი. ბოლო 10 წუთია 50-მდე უცნობი ზარი შემომივიდა და ახლაც გრძელდება", — წერს გვარამია ფეისბუქზე.

იუსტიციის ყოფილმა მინისტრმა, თეა წულუკიანმა ნიკა გვარამიას ტელეფონის ნომერი დღეს, პარლამენტის სხდომაზე გაასაჯაროვა. სიტყვით გამოსვლისას წულუკიანმა პარტია მოქალაქეების ლიდერ ალეკო ელისაშვილს უთხრა, რომ მან "დემოკრატიის მაღალი სტანდარტი" აჩვენა, როცა ტელეფონის ნომერი გამოაცხადა და სურდა, თავისი ნომერიც ეთქვა. წულუკიანმა ურჩია ელისაშვილს ნომერი ჩაეწერა და მერე განაცხადა, რომ ეს არა მისი, არამედ ნიკა გვარამიას ნომერი იყო და ელისაშვილს ურჩია, მისთვის დაერეკა.