ეკონომიკის მინისტრის, ნათია თურნავას განცხადებით, ეკონომიკის შემცირების წინასწარი პროგნოზი საკმაოდ მძიმე მაჩვენებელია, რომელიც მან მსოფლიო ტრენდსა და პანდემიას დაუკავშირა.

"ქვეყნის ეკონომიკა, წინასწარი პროგნოზით, შემცირდება 6 პროცენტით. ეს არის საკმაოდ მძიმე მაჩვენებელი, მაგრამ არის მსოფლიო ტრენდის ნაწილი", — აღნიშნა მინისტრმა საკოორდინაციო საბჭოს სხდომის შემდეგ.

როგორც ის განმარტავს, მნიშვნელოვანი გაჯანსაღება იყო სექტემბერ-ოქტომბერში, თუმცა მეორე ტალღამ "მძიმე დაღი დაასვა" როგორც რეგიონს, ისე ევროკავშირის ქვეყნებს:

"საბოლოოდ, ჯამში შედეგი არის იმაზე უფრო მძიმე, ვიდრე ჩვენ თავიდან ვპროგნოზირებდით".

ამის მიუხედავად, მინისტრი ამბობს, რომ მთავრობის გადაწყვეტილება ნოემბერში შეზღუდვების მიღებისა და მათი ეტაპობრივი შემსუბუქების აბსოლუტურად ადეკვატურია.

წინასწარი შეფასებით, დეკემბერში საქართველოს ეკონომიკა 7,9 პროცენტით შემცირდა, ხოლო 2020 წლის საშუალო რეალური ზრდა -6,1 პროცენტით განისაზღვრა.

კორონავირუსის პანდემიის გამო, მთავრობის გადაწყვეტილებით, 28 ნოემრბის შემდეგ ეკონომიკური საქმიანობების დიდი ნაწილი შეჩერებულია, მათ შორის ზამთრის ტურიზმი, რესტორნები მხოლოდ გატანის სერვისზე მუშაობენ და სავაჭრო მოლებიც დაკეტილია.