პარტია მოქალაქეების ლიდერის, ალეკო ელისაშვილის განცხადებით, თუ მმართველ პარტიასთან ისინი ორ საკითხზე — პოლიტმატიმრების გათავისუფლებასა და საარჩევნო სისტემის ცვლილებებზე შეთანხმდებიან, ის პარლამენტში შევა.

"თუ მოხდება დარჩენილი პოლიტმატიმრების გამოშვება, თუ შევთანხმდებით საარჩევნო სისტემის, პროცედურების, კანონმდებლობის ფუნდამენტურ ცვლილებაზე, ჩვენ მზად ვართ ხელი მოვაწეროთ შეთანხმებას და შევიდეთ პარლამენტში", — განაცხადა მან.

11 დეკემბერს მეათე მოწვევის პარლამენტმა, სადაც მხოლოდ ქართული ოცნება იმყოფება, ოფიციალურად დაიწყო მუშაობა. ოპოზიციის წარმომადგენლები არჩევნების ლეგიტიმურობას არ აღიარებენ და პარლამენტში არ შედიან. ისინი მოითხოვენ, არა მხოლოდ რიგგარეშე არჩევნების დანიშვნას, არამედ პოლიტმატიმრების გათავისუფლებასა და საარჩევნო ადმინისტრაციის თავმჯდომარის, თამარ ჟვანიას გადაყენებას.

ოპოზიციონერებმა მანდატების გაუქმების შესახებ ცესკოს უკვე მიმართეს. სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.