პარლამენტში ქართული ოცნების ფრაქციის ლიდერი, მამუკა მდინარაძის განცხადებით, პარტია მოქალაქეებს შეხვედრის დროს პოლიტპატიმრებზე არ ესაუბრნენ. ამის შესახებ მან ჟურნალისტებს შეხვედრის შემდეგ განუცხადა.

პარლამენტში შეხვედრის დასრულების შემდეგ, მოქალაქეების ლიდერებმა, ალეკო ელისაშვილმა და ლევან იოსელიანმა განაცხადეს, რომ პოლიტპატიმრების გათავისუფლების საკითხი ყველაზემძიმედ განსახილველი იყო.

"პირდაპირ გეტყვით, რომ პოლიტპატიმრების თემაზე მოკლედ მოვუჭერით და საერთოდ არ ვილაპარაკეთ. პოლიტპატიმრების საკითხის შემობრუნება სცადეს ორჯერ თუ სამჯერ, ჩვენ მათ ამ თემაზე არ ვესაუბრეთ. არჩილმაც [თალაკვაძემ] თქვა და მეც იმავეს გაგიმეორებთ, რომ საქართველოს პარლამენტი არ არის ადგილი, სადაც, ზოგადად, პატიმრებზე და მათ გათავისუფლებაზე უნდა ვილაპარაკოთ", — აღნიშნა მდინარაძემ.

რაც შეეხება უშუალოდ შეხვედრას, მდინარაძე ამბობს, რომ ისინი პრაქტიკულად შეთანხმებული არიან.

"შეიძლება ცოტა ზედმეტი სიჯიუტითაც და ზედმეტი ე.წ. პრინციპულობით უდგებიან ყველა იმ საკითხს, რასაც ზოგადად ოპოზიცია აყენებს და მეჩვენება რომ გარდა რიგგარეშე არჩევნებისა, რომელზეც ასე პრინციპულად არ უსაუბრიათ, პარტია მოქალაქეებს სურთ, რომ ყველა საკითხზე მიიღონ ჩვენგან თანხმობა. რაც წარმოუდგენელია. არის იქ დეტალები, რაც რაციონალურად, იურიდიულადაც, შეიძლება. შეუძლებელი იყოს", — განაცხადა ფრაქციის თავმჯდომარემ.

დღეს, 22 იანვარს პარლამენტში ქართული ოცნების და პარტია მოქალაქეების ინდივიდუალური შეხვედრა გაიმართა. ალეკო ელისაშვილის განცხადებით, განმარტებით, მათ სურდათ გაერკვიათ, აპირებდა თუ არა მმართველი პარტია კომპრომისზე წასვლას ოპოზიციასთან მოლაპარაკებებისას. მისი თქმით, დეტალურად განიხილეს ოთხივე პუნქტი, რასაც ჯერ კიდევ ფასილიტატორ ელჩებთან მოლაპარაკებებისას ითხოვდნენ.

პატრიოტთა ალიანსის საარჩევნო სიის წევრების პარლემენტში შესვლის შემდეგ, მხოლოდ მოქალაქეებისა და გირჩის წევრები ამბობდნენ უარს საპარლამენტო მანდატების გაუქმებაზე მანამ, სანამ მმართველ პარტიასთან მოლაპარაკებები არ დასრულდებოდა. სხვა ყველა ოპოზიციურმა პარტიამ მანდატებზე ოფიცალურად თქვა უარი.

ბოლო კვირებია მოქალაქეები და გირჩი ოპოზიციურ პარტიებთან ინდივიდუალური მოლაპარაკებების გამართვას ცდილობენ. მათ სურთ განიხილონ იდეა, რომლის მიხედვითაც 2021 წლის ადგილობრივი თვითმმართველობის არჩევნები შესაძლოა პლებისციტად ჩაითვალოს — თუ თვითმმართველობის არჩევნებში ოპოზიცია გაიმარჯვებს, უნდა ჩატარდეს ვადამდელი საპარლამენტო არჩევნები, თუ მმართველი პარტია — ვადამდელი საპარლამენტო არჩევნების ჩატარებას აზრიც ეკარგება.

18 იანვარს, ინდივიდუალურ მოლაპარაკებაზე მათ საჯაროდ უარი უთხრა სტრატეგია აღმაშენებლის ლიდერმა, გიორგი ვაშაძემ. 19 იანვარს, მსგავსი შინაარსის განცხადება ლელოს ერთ-ერთმა ლიდერმა, საბა ბუაძემაც გააკეთა. ერთიანი ნაციონალური მოძრაობის თავმჯდომარეს, ნიკა მელიას, მათთან შეხვედრაზე უარი არ უთქვამს და განაცხადა, რომ გირჩისა და მოქალაქეების ლიდერებს მიმდინარე თვის ბოლოს შეხვდება. მოქალაქეებისა და გირჩის ეს იდეა შეაფასა გირჩის ყოფილმა და ახლა უკვე პარტია გირჩი — მეტი თავისუფლების ლიდერმა, ზურაბ ჯაფარიძემაც. მისი თქმით, ოპოზიციურ სპექტრში ამ იდეაზე შეთანხმების და შემდეგ, ქართული ოცნების თანხმობის შანსი ნულის ტოლია.

გაიგეთ მეტი:

ამავე თემაზე: