წლის ერთ-ერთი ყველაზე მნიშვნელოვანი კინომოვლენის, კანის ფესტივალის ჩატარების თარიღები ცნობილია. წელს ღონისძიება 6 ივლისიდან 17 ივლისამდე გაიმართება.

ფესტივალი, რომელიც, ჩვეულებრივ, მაისის თვეში ტარდება ხოლმე, წელს ორჯერ გადაიდო კორონავირუსის პანდემიის გამო. თავდაპირველად, ღონისძიების ჩატარების თარიღებად 11-დან 22 მაისამდე პერიოდი განიხილებოდა, თუმცა საფრანგეთში გართულებული ეპიდსიტუაციის გამო, საჭირო გახდა, ფესტივალის გამართვა ივლისის თვემდე გადადებულიყო.

რადგან კანი საკურორტო ქალაქიცაა და ტურისტებისთვის საყვარელ ადგილად მიიჩნევა, ივლისსა და აგვისტოში, როგორც წესი, სეზონის პიკია და სასტუმროებში ადგილები, ფაქტობრივად, არ არის, თუმცა კვლავაც პანდემიის გამო, გასული და წლევანდელი წლები გამონაკლისია. 2020 წელს ქალაქში გასამართავი ღონისძიებები ერთმანეთის მიყოლებით გაუქმდა, რამაც ტურისტულ ბიზნესზე, ცხადია, მძიმედ იმოქმედა. აქედან გამომდინარე, კინოფესტივალის შუა ზაფხულში გადატანამ, როცა სასტუმროებისა და გასაქირავებელი ბინების ფასები ისედაც მაღალია, შესაძლოა, ღირებულების საგრძნობლად გაზრდის პრობლემაც წარმოშვას.

ფოტო: Shutterstock

ისტორიაში პირველად, პრესტიჟული ღონისძიება 2020 წელს არ ჩატარდა, მის ნაცვლად კი საფესტივალო ფილმების ნაწილი ოქტომბრის თვეში გამართულ მოკრძალებულ ცერემონიაზე აჩვენეს. შესაბამისად, ფესტივალის ორგანიზატორები ყველა გზას მიმართავენ, რომ წელსაც იმავე სცენარით არ განვითარდეს ისტორია. როგორც ცნობილია, თუკი ივლისში დაგეგმილი ღონისძიების გამართვა შეუძლებელი იქნება, თარიღები აგვისტოს მიწურულისკენ, ან ყველაზე უარეს შემთხვევაში, სექტემბრის დასაწყისში გადაიწევს. ეს უკანასკნელი ყველაზე არასასურველი ალტერნატივაა, რადგან სექტემბრის პირველ ნახევარში ვენეციის კინოფესტივალია დაგეგმილი.

სპაიკ ლი, რომელიც 2020 წელს უნდა ყოფილიყო კინოფესტივალის ჟიურის ხელმძღვანელი, სავარაუდოდ, წელსაც შეითავსებს ამ როლს.