გორში, კომბინატის დასახლებაში, შინდისის გმირების გამზირზე ქუჩის ნომრის აღმნიშვნელი აბრები რუსულმა კომპანია მაქსიმმა დაამზადა. ინფორმაცია ამის შესახებ თავდაპირველად ტელეკომპანია თრიალეთმა გაავრცელა. კადრებში ჩანს, რომ მაქსიმმა აბრას საკუთარი ტაქსის რეკლამაც დაურთო. გარდა ამისა, რუსულმა კომპანიამ "შინდისის გმირების გამზირის" ნაცვლად, აბრაზე "შინდისის გმირების გზატკეცილი" დააწერა.

On.ge დაუკავშირდა გორის მერიას, სადაც აცხადებენ, რომ რუსულმა კომპანიამ აბრის დამზადებისთვის უწყებას თავად მიმართა.

"კონკურსი არ ჩატარებულა, რადგან არ სჭირდებოდა ამას კონკურსი. ბიუჯეტის ფულიც არ დახარჯულა, უფასოდ გაკეთდა", — გვითხრეს მერიის პრესსამსახურში.

მერიის ერთ-ერთი წარმომადგენელი კი, ტელეკომპანია თრიალეთთან ამბობს, რომ შინდისის გმირების გამზირის გარდა, მაქსიმმა მათ სხვა ქუჩების აბრების დამზადებაზეც მიმართა. უწყებაში ირწმუნებიან, რომ ყველაფერი კონკურენციისა და კანონმდებლობის შესაბამისად არის გაკეთებული.

"კომპანიამ მოგვმართა, ჩვენთვის არ არის ცნობილი რუსულია თუ სადაურია. შემოგვთავაზა, რომ განათავსებდა აბრებს და მათი სარეკლამო პატარა ბროშურაც იქნებოდა განთავსებული. მერიამ განიხილა, კანონმდებლობაში ჯდებოდა და გასცა თანხმობაც. ნებისმიერ კომპანიას შეუძლია მსგავსი რაღაცის გაკეთება, ქართული იქნება თუ უცხოური", — განაცხადა თრიალეთთან მერიის ადმინისტრაციის სამსახურის უფროსმა, ალექსანდრე თარხნიშვილმა.

მერიაში On.ge-ს, ასევე, უთხრეს, რომ დამისამართების დროს დაშვებული ხარვეზი გამოსწორდება, თუმცა, ვინ გამოასწორებს რუსული მაქსიმის მიერ დაშვებულ შეცდომას, ჯერჯერობით, არ იციან.