იუსტიციის მინისტრის, გოჩა ლორთქიფანიძის განცხადებით, ტესტირების შედეგად გლდანის #8 და ქსნის #15 დაწესებულებაში კორონავირუსის 78 შემთხვევა დაფიქსირდა. კერძოდ, გლდანში 38, ქსანში კი 40.

მინისტრის ინფორმაციით, გლდანში ინფიცირებული 38 პატიმრიდან, 30 უსიმპტომოა და ისინი, ისევე, როგორც მათი კონტაქტები საკარანტინე სივრცეში არიან. დანარჩენი 8 კი სიმპტომების გამოვლენის გამო სამოქალაქო კლინიკაში გადაიყვანეს.

"მათ ყოველდღიურად, როგორც ადრე არაერთხელ განგვიცხადებია, უტარდებათ მუდმივი კონტროლის ღონისძიებები, რომლებიც სამედიცინო პროტოკოლით არის გათვალისწინებული. მონიტორინგის ქვეშ არიან, ეს არის თერმოსკრინინგი, სატურაციის კონტროლი. ამას ემატება 72 საათში ანტიგენით ტესტირება და შემდეგ ისევ განმეორებით PCR ტესტირება", — განაცხადა ლორთქიფანიძემ.

რაც შეეხება #15 დაწესებულებას ქსანში, მინისტრის თქმით, გააკეთეს 1 735 ტესტი, საიდანაც დადებითი იყო 40. მისივე თქმით, არის ცალკეული შემთხვევები, რომელზეც კვლევა გრძელდება.

"აღსანიშნავია, ეს 40 დადასტურებული პირი არის უსიმპტომო პაციენტები, მათი ჰოსპიტალიზაცია არ გახდა საჭირო. ისინი იზოლირებული არიან დაწესებულების დანარჩენი კონტიგენისაგან და მედპერსონალის მუდმივი კონტროლის ქვეშ იმყოფებიან", — განაცხადა მან.

მინისტრის თქმით, ინტენსიური ტესტირება ჩატარდა 10 პენიტენციურ დაწესებულებაში, სულ გაკეთდა 6 654 ტესტი და ჯამში დადასტურდა 113 შემთხვევა. მისივე თქმით, სისტემაში სულ 9 000-ზე მეტი მსჯავრდებულია და ტესტირების პროცესი იანვრის ბოლომდე დასრულდება.