ევროპის საბჭოს საპარლამენტო ასამბლეაში (PACE) უკრაინის რადის დეპუტატი, ალექსეი გონჩარენკო დელეგატებს მოუწოდებს, მხარი დაუჭირონ რუსეთისთვის უფლებამოსილების არცნობის საკითხს. PACE-ში გამოსვლისას უკრაინელი დეპუტატი ხშირად საუბრობს რუსეთის აგრესიაზე.

"მინდა მივმართო ყველას, ვინც არ დაუჭირა მხარი ამ ინიციატივას. დაფიქრდით და გაიაზრეთ ერთი რამ, რუსეთსა და ცივილურ სამყაროს შორის ომი მიმდინარეობს", — აღნიშნა გონჩარენკომ.

მან ბელარუსში მიმდინარე საპროტესტო აქციებზე ისაუბრა და განაცხადა, რომ ლუკაშენკოს დიქტატურას ვლადიმერ პუტინი უჭერს მხარს. გარდა ამისა, მას უკრაინასა და საქართველოში რუსულ აგრესიასაც გაუსვა ხაზი.

"საქართველოს ტერიტორიები კვლავ ოკუპირებულია რუსეთის მიერ. რა შეიცვალა? არაფერი. მინდა მხარდაჭერა გამოვუცხადო ჩვენს ქართველ მეგობრებს. ამაში ვინაა დამნაშავე? პუტინი. უკრაინაში რუსული აგრესიის დაწყების დღიდან 13 ათასზე მეტი ადამიანია მოკლული. ამ წელსაც ისინი კვლავ კლავენ ადამიანებს და ომი არ დასრულებულა. და ვინ წარმართავს ამ ომს? პუტინი.

რუსეთის ფედერაციის შიგნით რას ვხედავთ.? ნავალნის საქმეს. 21-ე საუკუნეში ისევ ქიმიური იარაღი ოპოზიციონერის მოსაკლავად. პრეზიდენტი თვითონ კლავს მათ, ვინც მის წინააღმდეგაა", — აღნიშნა გონჩარენკომ.

უკრაინელი დეპუტატი ამბობს, რომ რუსეთის წარმომადგენლებისთვის უფლებამოსილების შეჩერება აუცილებელია, რადგან ისინი არა დელეგატები, არამედ პუტინს "მკვლელობებსა და კორუფციაში" ეხმარებიან.

დღეს, 25 იანვარს ევროპის საბჭოს საპარლამენტო ასამბლეაზე (PACE) რუსეთისთვის უფლებამოსილების არცნობის საკითხი დააყენეს. აღნიშნული ინიციატივით ასამბლეის ზამთრის სესიის პირველ სხდომაზე უკრაინის დელეგაციის ხელმძღვანელი, მარია მეზენცევი გამოვიდა.

მეზენცევას თქმით, რუსეთი აგრძელებს ადამიანის უფლებების უგულებელყოფას, მათ შორის ოკუპირებულ ტერიტორიებზე. უფლებამოსილების გასაჩივრებას მხარი 38 დელეგატმა დაუჭირა, წინააღმდეგი იყო 61, ხოლო 51-მა თავი შეიკავა. აღნიშნულ ინიციატივას მხარი დაუჭირა საქართველოს დელეგაციამაც.

რუსეთის დელეგაციის საკითხი ორ დღეში გადაწყდება.

2019 წლის ზაფხულში ევროსაბჭოს საპარლამენტო ასამბლეამ მიიღო რეზოლუცია, რომელიც რუსეთს ასამბლეაში დაბრუნების საშუალებას აძლევს. ასამბლეის სხდომაზე მიღებულმა რეზოლუციამ ცვლილებები შეიტანა PACE-ს რეგლამენტშიც, რომელიც კრძალავს ევროსაბჭოს დელეგაციებისთვის ხმის და ასამბლეაში გამოსვლის უფლების ჩამორთმევას.

ყირიმის ანექსიის გამო PACE-მ 2014 წელს რუსეთს ხმის მიცემის უფლება ჩამოართვა. ერთი წლის შემდეგ ორგანიზაციამ სანქციები გაახანგრძლივა, რის გამოც რუსეთმა ასამბლეის სესიებში მონაწილეობაზე უარი განაცხადა. გარდა ამისა, 2017 წლიდან რუსეთმა ევროსაბჭოს ბიუჯეტში საწევრო შენატანის გაკეთება შეწყვიტა.

ხმის უფლების ჩამორთმევის გარდა რუსებს არ შეეძლოთ PACE-ში მომხსენებლობა, სხვა ქვეყნებში არჩევნებზე დამკვირვებლობა და საერთაშორისო ორგანიზაციებში ასამბლეას წარდგენა. ამასთანავე, მათ PACE-ში წამყვანი პოზიციების დაკავება ეკრძალებოდათთ.