მარკ ტვენის დაუმთავრებელი ზღაპარი 2017 წელს გამოიცემა

ზღაპარი, რომელსაც მარკ ტვენი ძილის წინ თავის გოგონებს, კლარასა და სუსის უამბობდა, რამდენიმე თვეში გამოიცემა. დაუმთავრებელ ნაწარმოებს ახალ სიცოცხლეს მწერალი ფილიპ სტედი და ილუსტრატორი ერინ სტედი ერთად შესძენენ.

პრინც ოლეომარგარინის მოტაცება მწერალმა 1879 წელს პარიზში ვიზიტის დროს დაწერა. ხელნაწერები მარკ ტვენის ლიტერატურის მკვლევარმა, ჯონ ბირდმა აღმოაჩინა და საჯარო გახადა.

პრესრელიზის თანახმად, ზღაპარი პატარა ბიჭზე მოგვითხრობს, რომელიც ჯადოსნური მარცვლიდან ამოსულ ყვავილს შეჭამს და ცხოველებთან საუბრის უნარს შეიძენს. ამის შემდეგ, ბიჭი და მისი ოთხფეხა მეგობრები მოტაცებული პრინცის გადარჩენას გადაწყვეტენ. ნაწარმოებში ბევრი "შეუვსებელი ადგილია", რომლებიც მწერალმა ფილიპ სტედმა ლეგენდარული მწერლის სტილის გათვალისწინებით დაასრულა. მარკ ტვენის იუმორსა და უდარდელ ხელწერას თაყვანისმცემლები ამ არაჩვეულებრივ ამბავშიც აღმოაჩენენ.

წიგნი 2017 წლის 26 სექტემბერს 250 000-იანი ტირაჟით გამოიცემა.

^{მარკ ტვენის ჩანაწერები}