სტრატეგია აღმაშენებლის ლიდერი, გიორგი ვაშაძე განმარტავს, რა ტიპის კომუნიკაცია ჰქონდა გირჩის ლიდერებთან, ინდივიდუალურ შეხვედრასთან დაკავშირებით. მისი თქმით, მიიღო წერილი ვახო მეგრელიშვილისგან, რომ შეხვედრა სურდათ და ამას დათანხმდა, თუმცა მას შემდეგ, რაც გირჩის წევრებმა ტელევიზიაში ისაუბრეს ამ შეხვედრაზე და საზოგადოებას არასწორი მოლოდინები გაუჩნდა, მან უარი თქვა.

"მე მინდა ერთი რამ ვთქვა — შეხვედრას არასდროს პრობლემა არ ედგა წინ, ვახოს მოუწერია ჩემთვის და შევხედრილვართ.

ასე იყო, მარტივად რომ ვთქვათ: მომწერა როდის ჩამოდიხარ, შევხვდეთ. კი ბატონო, თქვენც რომ მომწეროთ და ვინც არ უნდა მომწეროს, რა პრობლემაა ამ შეხვედრის. მაგრამ ტელევიზიებით ფორმატს რომ მიგეგმავ, პომპეზურობას სძენ რომ ტელევიზიით უნდა მოვიდე, შემდეგი რაუნდი შეხვედრის არის გიორგი ვაშაძესთან... მოდი, გულწრფელად ვთქვთ, ძალიან ბევრმა ეს აღიქვა, რომ აი, ვსიო... ვიღაცეები მწერდნენ, გიორგი ე.ი. შედიხარ პარლამენტში... ასეთი აღქმა იყო ახლა, თქვენ კარგად მოგეხსნებათ რას ნიშნავს ასეთი ტიპის საუბრები და შეხვედრები.

ამაზე ვთქვი მე უარი და ვთქვი, რომ მაშინ საერთო ფორმატში განვიხილოთ ყველაფერი. მე იმედი მქვს, რომ ეს ხალხი დაასრულებს უაზრო საუბარს", — განაცხადა მან.

რამდენიმე დღის წინ პარტია მოქალაქეებმა და გირჩმა წარადგინეს ერთობლივი იდეა, რომ ადგილობრივი არჩევნების შედეგები განხილული იყოს, როგორც პლებისციტი და თუ ოპოზიცია გაიმარჯვებს, დაინიშნოს რიგგარეშე არჩევნები. მათ სურდათ, ეს ინიციატივა ოპოზიციასთან ინდივიდუალურად განეხილათ და შემდეგ მმართველი გუნდისთვის წარედგინათ.

მას შემდეგ, რაც გირჩმა განაცხადა, რომ შეხვედრები იყო დაგეგმილი, სტრატეგია აღმაშენებლის ლიდერმა, გიორგი ვაშაძემ უარი თქვა ინდივიდუალურ შეხვედრაზე და აღნიშნა, რომ ყველაფერი უნდა იყოს განხილული საერთო ფორმატში. იაგო ხვიჩიამ განაცხადა, რომ მისთვის მოულოდნელი იყო ვაშაძის საჯარო უარი, რადგან მასთან მოლაპარაკებები ჰქონდათ.

"გიორგი ვაშაძეს, ჩემი აზრით, თავის ამაზრზენ საქციელზე მოუწევს ბოდიშის მოხდა. სხვა შემთხვევაში, მას სულ ასე მოუწევს დამალვა", — განაცხადა ხვიჩიამ.

დღეს, 22 იანვარს გირჩის ერთ-ერთმა ლიდერმა, სანდრო რაქვიაშვილმა განაცხადა, რომ მას სურს, სტრატეგია აღმაშენებლის ლიდერთან, გიორგი ვაშაძესთან ისაუბროს იმაზე, ჰქონდათ თუ არა მათ პარტიებს კომუნიკაცია ცალკე მოლაპარაკებებზე.

"გიორგის შემთხვევაში, ძალიან მინდა, რომ ჩემ წინ იჯდეს, თვალებში ერთმანეთს ვუყურებდეთ და გავარჩიოთ ეს საკითხი, თუ ჩვენ მართლა გვაინტერესებს, ვინ ვისთან იყო შეთანხმებული. მე სიამოვნებით ყველას დაველაპარაკები, გიორგისაც მინდა დაველაპარაკო. არ მინდა, რომ რამე კითხვა დარჩეს. თუ გიორგი ამტკიცებს, რომ რამე სათანადო კომუნიკაცია არ იყო ჩვენ შორის, ერთად გავარჩიოთ ეს საკითხი, არ არის პრობლემა", — განაცხადა რაქვიაშვილმა.

სწორედ ამ განცხადებებს გამოეხმაურა ვაშაძე.