გასული წლის 24 ნოემბერს ევროპის ასტრონომიულ დღის ფოტოდ დავით დვალის ფოტო აირჩიეს, რაც აშკარად ვიზალიბერალიზაციის წინა პირობა იყო - ასტროვიზალიბერალიზაცია!

დავით დვალი პირველი ასტროფოტოგრაფია საქართველოში. მან ზუსტად ორი წლის წინ ამ დღეს დააფუძნა ასტროფოტოგრაფების მოყვარულების ჯგუფი სახელად Geo-Astro. გვერდს უკვე 30 000-ზე მეტი მოწონება აქვს. Geo-Astro-ს წევრები სკოლებსა და უნივერსიტეტებში (და არა მარტო) დადიან და საუბრობენ თავიანთი საქმიანობის შესახებ, უზიარებენ მოსწავლეებს გამოცდილებას, ასწავლიან ასტროფოტოგრაფიის საფუძვლებს და ა.შ.

ფოტოზე, რომელიც ევროპის ასტრონომიულ დღის ფოტოდ შეირჩა, ასახულია გალაქტიკა NGC 7497, რომელიც დედამიწიდან დაახლოებით 60 მილიონი სინათლის წლითაა დაშორებული. სპირალური გალაქტიკა პეგასის თანავარსკვლავედში მდებარეობს და მის ფონზე სხვა გალაქტიკებიც მოჩანს. თვითონ ეს გალაქტიკა კი თვალწარმტაც ნისლეულ MBM 54-ის უკან იმყოფება. გალაქტიკა 60 000-ჯერ უფრო შორსაა, ვიდრე ეს შავი ნისლეული, თუმცა ფოტოზე ისე ჩანს, თითქოს ისინი ჰარმონიულად გაერთიანებული იყოს.

ფოტო: DAVID DVALI

ასტროფოტოგრაფ დავით დვალის კამერა 6,7 საათის განმავლობაში აგროვებდა 60 მილიონი წლის წინ წამოსულ სინათლის ნაწილაკებს, რათა ეს საოცარი ფოტო მიეღო. ფოტო აბასთუმნის ასტროფიზიკური ობსერვატორიიდანაა გადაღებული.