მოქალაქეების ლიდერი, ალეკო ელისაშვილი ამტკიცებს, რომ პარლამენტში საკუთარი ცხოვრების მოწყობაზე არ იზრუნებს და "მანქანებისა და ჯიპების" მომსახურების ნაცვლად, ფეხით ივლის. ამის შესახებ მან რუსთავი 2-ის ეთერში ისაუბრა.

"პარლამენტში ჩვენი ცხოვრების მოწყობაზე კი არ ვიზრუნებთ და მანქანებსა და ჯიპებს კი არ მოვიმსახურებთ, აგერ ნახავთ, რომ როგორც დავდიოდი ფეხით, ისე ვივლი ფეხით. მეც და ლევან იოსელიანიც. ლევანსაც მანქანა ჰყავს და მეც, მაგრამ მე აუცილებლად ფეხით ვივლი და ლევანიც", — განაცხადა ელისაშვილმა.

დღეს პარტია მოქალაქეების სადეპუტატო უფლებამოსილების მქონე ორი წევრი, ალეკო ელისაშვილი და ლევან იოსელიანი პარლამენტში ქართულ ოცნებას შეხვდა. შეხვედრაზე მმართველ პარტიას არჩილ თალაკვაძე და მამუკა მდინარაძე წარმოადგენდნენ.

პატრიოტთა ალიანსის საარჩევნო სიის წევრების პარლემენტში შესვლის შემდეგ, მხოლოდ მოქალაქეებისა და გირჩის წევრები ამბობდნენ უარს საპარლამენტო მანდატების გაუქმებაზე მანამ, სანამ მმართველ პარტიასთან მოლაპარაკებები არ დასრულდებოდა. სხვა ყველა ოპოზიციურმა პარტიამ მანდატებზე ოფიცალურად თქვა უარი.

ბოლო კვირებია მოქალაქეები და გირჩი ოპოზიციურ პარტიებთან ინდივიდუალური მოლაპარაკებების გამართვას ცდილობს. მათ სურთ განიხილონ იდეა, რომლის მიხედვითაც 2021 წლის ადგილობრივი თვითმმართველობის არჩევნები შესაძლოა პლებისციტად ჩაითვალოს. მათი განცხადებით, თუ თვითმმართველობის არჩევნებში ოპოზიცია გაიმარჯვებს, უნდა ჩატარდეს ვადამდელი საპარლამენტო არჩევნები, თუ მმართველი პარტია — ვადამდელი საპარლამენტო არჩევნების ჩატარებას აზრიც ეკარგება.

18 იანვარს, ინდივიდუალურ მოლაპარაკებაზე მათ საჯაროდ უარი უთხრა სტრატეგია აღმაშენებლის ლიდერმა, გიორგი ვაშაძემ. 19 იანვარს, მსგავსი შინაარსის განცხადება ლელოს ერთ-ერთმა ლიდერმა, საბა ბუაძემაც გააკეთა. ერთიანი ნაციონალური მოძრაობის თავმჯდომარეს, ნიკა მელიას, მათთან შეხვედრაზე უარი არ უთქვამს და განაცხადა, რომ გირჩისა და მოქალაქეების ლიდერებს მიმდინარე თვის ბოლოს შეხვდება. პარტიების ეს იდეა შეაფასა გირჩის ყოფილმა და ახლა უკვე პარტია გირჩი — მეტი თავისუფლების ლიდერმა, ზურაბ ჯაფარიძემაც. მისი თქმით, ოპოზიციურ სპექტრში ამ იდეაზე შეთანხმების და შემდეგ, ქართული ოცნების თანხმობის შანსი ნულის ტოლია.

გაიგეთ მეტი: