NATO-ს გენერალური მდივნის, იენს სტოლტენბერგის განცხადებით, საქართველოს პრეზიდენტ სალომე ზურაბიშვილთან უსაფრთხო კომუნიკაციის, საზღვაო მხარდაჭერის გაძლიერებასა და სხვადასხვა საკითხზე ისაუბრეს.

"ჩვენი ძირითადი პრიორიტეტები მოიცავს უსაფრთხო კომუნიკაციას. ასევე, შეხვედრისას ვისაუბრეთ ტრენინგებსა და წვრთნებზე, საზღვაო მხარდაჭერისა და სიტუაციური გათვითცნობიერებულობის საკითხზე. დღეს ჩვენ, აგრეთვე, შევეხეთ უსაფრთხოებას შავი ზღვის რეგიონში და რუსეთის გაძლიერებულ სამხედრო მშენებლობას. NATO მხარს უჭერს საქართველოს ტერიტორიულ მთლიანობასა და მის სუვერენიტეტს საერთაშორისოდ აღიარებულ საზღვრებში", — განაცხადა სტოლტენბერგმა ზურაბიშვილთან შეხვედრის დასრულების შემდეგ გამართულ პრესკონფერენციაზე.

მან, ასევე, კიდევ ერთხელ მოუწოდა რუსეთს, ოკუპირებული სამხრეთ ოსეთისა და აფხაზეთის რეგიონების დამოუკიდებლობის აღიარება უკან გაიწვიოს და ტერიტორიებიდან ჯარები გაიყვანოს.

"ადამიანის უფლებათა ევროპულ სასამართლოს გადაწყვეტილება მხოლოდ აძლიერებს ჩვენს მოწოდებას რუსეთი საერთაშორისო სამართალს დაექვემდებაროს და ტერიტორიულ მთლიანობას პატივი სცეს. ჩვენ, ასევე, განვიხილეთ პროგრესი, რომელსაც საქართველო რეფორმების სფეროში ახორციელებს. ეს არის მნიშვნელოვანი, რადგან რეფორმებზე პროგრესი უფრო გვაახლოებს ერთიან მიზანთან, NATO-ს წევრობასთან", — განაცხადა NATO-ს გენერალურმა მდივანმა.

სალომე ზურაბიშვილი სამუშაო ვიზიტით ბრიუსელში 20 იანვარს გაემგზავრა. ვიზიტის ფარგლებში დაგეგმილი იყო შეხვედრები ევროკავშირისა და NATO-ს ხელმძღვანელ პირებთან.

გაიგეთ მეტი: