თბილისის მერის, კახა კალაძის განცხადებით, სტრასბურგის სასამართლოს გადაწყვეტილებით "ყინული დაიძრა", მისი თქმით, "სიმართლის მთაზე ცოცვა არასდროსაა ამაო". ასე აფასებს იგი ადამიანის უფლებათა ევროპული სასამართლოს გადაწყვეტილებას, რომლის თანახმადაც, აგვისტოს 2008 წლის ომზე საქართველოს ყველა ძირითადი სარჩელი დაკმაყოფილდა.

"ეს გადაწყვეტილება არის დიდი გარღვევა საერთაშორისო ასპარეზზე საქართველოს პოზიციონირებისთვის, არის მნიშვნელოვანი ბერკეტი დეოკუპაციისთვის. ორი სიტყვით კი — ყინული დაიძრა! ასეა, "სიმართლის მთაზე ცოცვა არასდროსაა ამაო". არც ის დაგვავიწყდეს, რომ გამარჯვებას ზრუნვა უყვარს. წარმატებას ვუსურვებ ჩვენს ქვეყანას გამარჯვების დიდ გზაზე და მადლობა ყველას, ვისაც ამაში საკუთარი წვლილი შეაქვს", — დაწერა კალაძემ საკუთარ ფეისბუქზე.

ადამიანის უფლებათა ევროპული სასამართლოს დიდმა პალატამ აგვისტოს 2008 წლის ომზე საქართველოს ძირითადი სარჩელი დააკმაყოფილა. კერძოდ, სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა. სასამართლოს დიდმა პალატამ, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

საქართველოს იუსტიციის სამინისტროს განცხადებით, ამ და სხვა დარღევევების აღიარებით, 2008 წლის აგვისტოს ომის დროს რუსეთის მიერ ქართველების წინააღმდეგ განხორციელებული ეთნიკური წმენდა დასტურდება.

გაიგეთ მეტი: