18 იანვარს, გელათის ღვთისმშობლის სახელობის ტაძრის დასავლეთი მკლავის სამხრეთ ფერდზე ქარის შედეგად დროებითი გადახურვის ფრაგმენტი ისევ აძვრა, საქართველოს კულტურული მემკვიდრეობის დაცვის ეროვნულმა სააგენტომ სამუშაოების შემსრულებელი კომპანიები — ხელოვნების საერთაშორისო ცენტრსა და იკორთა 2007 დააჯარიმა.

"ფიზიკური სამუშაოების პროცესში დაშვებული შეცდომების მიზეზით, 18 იანვარს მთავარი ტაძრის დასავლეთი მკლავის სამხრეთ ფერდზე ქარის შედეგად დროებითი გადახურვის ფრაგმენტი აძვრა. დაზიანებული კონსტრუქციის აღდგენის სამუშაოები ეროვნული სააგენტოს ინიციატივით 18 იანვრის საღამოდანვე დაიწყო და დღეს დასრულდება", — განმარტავენ კულტურული მემკვიდრეობის დაცვის სააგენტოში.

სააგენტოს თანახმად, მონიტორინგის სამსახურის მიერ გასულ წელს გაცემული გაფრთხილების მიუხედავად, შემსრულებელმა კომპანიებმა სანებართვო პირობების გადაცდომით შესრულებული სამუშაოების შედეგების გამოსწორება ამ დრომდე ვერ უზრუნველყვეს, რაც მთელ რიგ კონსტრუქციულ ელემენტებზე გამოვლენილი ხარვეზების აღმოფხვრას ითვალისწინებდა.

"პრევენციული ქმედებების ფარგლებში ჩატარებული სამუშაოებისას გამოვლენილი ხარვეზების გამოუსწორებლობის გამო, შემსრულებელ კომპანიებს ხელოვნების საერთაშორისო ცენტრსა და იკორთა 2007-ს ადმინისტრაციული სამართალდარღვევის კოდექსით გათვალისწინებული ჯარიმები განესაზღვრათ, რომელიც მსოფლიო მემკვიდრეობის ნუსხაში მყოფი ძეგლის გათვალისწინებით, 12 000-12 000 ლარს მოიცავს", — აცხადებენ სააგენტოში.

მათივე ინფორმაციით, აღდგენილი მყარი გადახურვის სათანადო წესით გამაგრების პარალელურად, სააგენტოს ინსპექტირების ჯგუფის სპეციალისტების ზედამხედველობით დროებითი გადახურვების ყველა არეალი გადამოწმდება.

სააგენტოს ცნობით, პრევენციული ქმედებებისას შესრულებული სამუშაოების ხარვეზების აღმოფხვრას დღეიდან კომპანია ბაგინეთი + განახორციელებს. სამუშაოების წარმართვას კი ფინანსურად სამართლებრივი პასუხისმგებლობის მქონე კომპანიები უზრუნველყოფენ. სააგენტოში, ასევე, აღნიშნავენ, რომ არსებული ხარვეზების გამოსწორების პროცესი სააგენტოს ინსპექციის ჯგუფის მუდმივი მეთვალყურეობით წარიმართება.

გაიგეთ მეტი: