ახლადშექმნილი პარტია ევროპელი სოციალისტების დამფუძნებლები, რომლებიც ადრე პატრიოტთა ალიანსის წევრები იყვნენ და საპარლამენტო მანდატებიც სწორედ ამ პარტიის სიით მიიღეს, აცხადებენ, რომ საქართველოს ინტეგრაცია ევროატლანტიკურ სივრცეში შეუქცევადია და ამას ალტერნატივა არ აქვს.

"საქართველოს ინტეგრაცია ევროატლანტიკურ სივრცეში არის შეუქცევადი გზა და ამას ალტერნატივა არ აქვს. საქართველო არის და იქნება ევროპის განუყოფელი ნაწილი. პარტიის თავჯდომარე ბატონი ფრიდონ ინჯია გახლავთ საქართველოს პარლამენტის ევროპის საბჭოს საპარლამენტო ასამბლეის წევრი და პარტიის საპარლამენტო დეპუტატთა საქმიანობა ამ მიმართულებით იქნება ძალიან აქტიური. სწორედ ამიტომ, მნიშვნელოვანია ჩვენმა ქვეყანამ ღირსეული ადგილი დაიმკვიდროს ევროპულ თანამეგობრობაში. ევროპელი სოციალისტების ხედვა საქართველოს მომავლის განვითარებასთან დაკავშირებით სწორედ ევროატლანტიკურ სტრუქტურებთან მჭიდრო თანამშრომლობას უკავშირდება. პარტიას მიაჩნია, რომ ქვეყნის საგარეო კურსი უნდა იყოს ორიენტირებული მრავალვექტორულ პოლიტიკაზე და კეთილმეზობლურ ურთიერთობებზე", — აცხადებენ პარტიაში.

პარლამენტის დეპუტატებმა, რომლებმაც მანდატები პატრიოტთა ალიანსის სიით მოიპოვეს, ახალი პოლიტიკური გაერთიანება ევროპელი სოციალისტები უკვე დააფუძნეს. მისი წევრები ფრიდონ ინჯია, დავით ზილფიმიანი, გელა მიქაძე და ავთანდილ ენუქიძე არიან.

9 იანვარს პარტიის ყრილობაზე ევროპელი სოციალისტების თავმჯდომარედ ფრიდონ ინჯია აირჩიეს. ასევე, დაამტკიცეს პარტიის წესედება და სარევიზიო კომისიის წევრებიც აირჩიეს. პოლიტიკური საბჭო 8 წევრით განისაზღვრა.

4 იანვარს პატრიოტთა ალიანსის სიის სამ წევრს — ირმა ინაშვილს, გიორგი ლომიასა და გოჩა თევდორაძეს — პარლამენტმა სადეპუტატო უფლებამოსილება შეუწყვიტა. რაც შეეხება სიის მეოთხე ნომერს, ავთანდილ ენუქიძეს მან მანდატზე უარი არ თქვა და პარლამენტში შევიდა. პატრიოტთა ალიანსის ის დეპუტატები კი, რომელთაც უარი თქვეს მანდატებზე, დავით ზილფიმიანმა, ფრიდონ ინჯიამ და გელა მიქაძემ ჩაანაცვლეს.

როგორც ფრიდონ ინჯიამ შემდეგ განმარტა, პარლამენტში შესვლა იმიტომ გადაწყვიტეს, რომ "ოპონირება" გაეწიათ ქართული ოცნებისთვის. დეპუტატმა მაშინვე განაცხადა, რომ პარლამენტში შესვლასთან ერთად ისინი პატრიოტთა ალიანსს ტოვებენ და ახალ პოლიტიკურ პარტიას ევროპელ სოციალისტებს წარადგენენ.

იმის გამო, რომ პატრიოტთა ალიანსი შეფასებულია, როგორც პრორუსული იდეების მატარებელ ორგანიზაციად, არაერთი კითხვა დაისვა მისი აწ უკვე ყოფილი წევრების საგარეო კურსის ხედვებზე. ზილფმიანი აღნიშნავდა, რომ პროდასავლურობაზე მასთან შეჯიბრი არ მოეწყოთ და თავის ბიოგრაფიაზე მიანიშნებდა.

ქართული ოცნების აღმასრულებელი მდივნის, ირაკლი კობახიძის მტკიცებით, საკანონმდებლო ორგანოში პატრიოტთა ალიანსის "რუსული შემადგენელი" არ შესულა. 5 იანვარს ქართულმა ოცნებამ უცხოელ პარტნიორებს საინფორმაციო ბიულეტენიც გაუგზავნა, სადაც განმარტავდა, რომ პარლამენტში პროევროპული პარტია შევიდა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.