არჩეულმა პრეზიდენტმა, ჯო ბაიდენმა ეკონომიკის სტიმულირების გეგმა წარადგინა, რომლის მოცულობაც 1,9 ტრილიონი დოლარია. ბაიდენს მიაჩნია, რომ კორონავირუსთან ბრძოლა და ეკონომიკის აღდგენა ერთმანეთთან პირდაპირ დაკავშირებულია, რაც მის გეგმაშიც ასახულია.

კონგრესის მიერ პაკეტის დამტკიცების შემთხვევაში, ტრილიონი დოლარი პირდაპირი დახმარებისთვის გამოიყოფა და თითოეული მოქალაქე 1 400 დოლარს მიიღებს. ამასთან, 440 მილიარდი მოხმარდება მცირე ბიზნესს, ხოლო 415 მილიარდი — კორონავირუსთან ბრძოლას.

კორონავირუსთან ბრძოლისთვის ბაიდენის გეგმა ითვალისწინებს, 20 მილიარდი დოლარის დახარჯვას ამერიკელების ვაქცინაციისთვის. როგორც მან ადრე განაცხადა, 100 დღეში მას 100 მილიონი ადამიანის აცრა სურს.

გარდა ამისა, არჩეული პრეზიდენტი 50 მილიარდის დახარჯვას აპირებს გაფართოებული ტესტირებისთვის. ხოლო გაზაფხულზე სკოლების უმეტესობის გახსნისთვის 130 მილიარდის გამოყოფა ითხოვს.

რაც შეეხება ეკონომიკურ ნაწილს, იმის გათვალისწინებით რომ ქვეყნის მასშტაბით 11 მილიონი ადამიანი უმუშევარია, ყოველკვირეული დახმარება 400 დოლარამდე გაიზრდება. ბაიდენის გეგმის პირდაპირ დახმარება 1 400 დოლარის ოდენობით დაემატება 600-დოლარიან დახმარებას, რომელიც წინა თვეში დაამტკიცეს. არჩეული პრეზიდენტი კონგრესისგან ითხოვს, რომ მინიმალური ხელფასი საათში 15 დოლარამდე გაიზარდოს.