ახალგაზრდა შვედი აქტივისტი, გრეტა თუნბერგი, ქვეყნის მიერ წარმოებულ ახალ საფოსტო მარკაზე გამოჩნდა. ეს გადაწყვეტილება ერთგვარი აღიარებაა იმ ძალისხმევისა, რომელიც გრეტამ გაიღო "შვედეთის უნიკალური ბუნების მომავალი თაობებისთვის შენახვის" საქმეში.

მარკაზე გამოსახული სურათი ერთ-ერთია მხატვარ ჰენინგ ტროლბეკის მიერ შექმნილი სერიიდან ღირსშესანიშნავი ბუნება. ილუსტრაციაზე ყვითელ საწვიმარში გამოწყობილი გრეტა კლდის წვერზე დგას, მის გარშემო კი ნამგალები დაფრინავენ.

შვედეთის საფოსტო სამსახურის, PostNord-ის განცხადებით, მარკების სერია, რომელიც ხელმისაწვდომი ამ კვირიდან გახდა, გარემოს დაცვის საკითხებთან დაკავშირებულ 16 გამორჩეულ მიღწევას ეხმიანება. მათი განხორციელება, რომელთა შორისაც დაცული ტერიტორიებისათვის განსაკუთრებული მნიშვნელობის სტატუსის მინიჭებაა, გასულ წელს, შვედეთის მთავრობის ძალისხმევით მოხერხდა.

სერიაში შემავალ სხვა მარკებზე, რომლებიც ქვეყნის შიგნით გაგზავნილი წერილებისთვისაა განკუთვნილი, მაღალმთიანი რეგიონები და მათი ფლორა, ტყეები, სასოფლო-სამეურნეო ლანდშაფტები და ბიომრავალფეროვნებით გამორჩეული ჭაობებია ასახული. წლევანდელი წლის ევროპულ საფოსტო მარკაზე კი გადაშენების პირას მყოფი მწვანეწერტილა გომბეშოც გამოჩნდა.

"მოხარულები ვართ, რომ გრეტა, ბუნების ღირსშესანიშნაობების სხვა ილუსტრაციებთან ერთად, სიმბოლურად იქნება წარმოჩენილი მარკაზე", — აღნიშნავს PostNord-ის წარმომადგენელი, ქრისტინა ოლოფსდოტერი, — "ბუნების ეს ნაწილები განსაკუთრებულად მნიშვნელოვანია და ჩვენ, ყველამ, ჩვენი წილი საქმე უნდა შევასრულოთ მათ დასაცავად".

გასულ წლებში შვედეთის საფოსტო მარკებზე გამოსახულნი იყვნენ საბავშვო მწერალი ასტრიდ ლინდგრენი, ფეხბურთელი ზლატან იბრაჰიმოვიჩი და DJ და მუსიკის პროდიუსერი, Avicii.

3 იანვარს, მე-18 დაბადების დღის აღსანიშნავად გამოქვეყნებულ ინტერვიუში, გრეტამ განაცხადა, რომ "რაღაცების" მოხმარება შეზღუდა, თუმცა, ამის მიუხედავად, არ განსჯიდა მათ, ვინც, მისგან განსხვავებით, არ იღებდა გარემოსთვის სასიკეთო გადაწყვეტილებებს.

"არავის მოვუწოდებ, რა გააკეთოს, თუმცა, როცა ამის შესახებ ხმას იმაღლებ და თავად არ იქცევი ისე, როგორც სხვებს მოუწოდებ, მაშინ ამისთვის გაგაკრიტიკებენ და შენს ნათქვამს სერიოზულად არ მიიღებენ", — აღნიშნა თუნბერგმა.