ქართული ოცნების დამფუძნებელი და ამავე პარტიის თავმჯდომარის თანამდებობიდან ორგზის გადამდგარი ივანიშვილი პირობას დებს, რომ პოლიტიკაში არ დაბრუნდება. ამბობს, რომ სიტყვას აუცილებლად შეასრულებს და კიდევ ბევრ რამეს არ გააკეთებს. მაგალითად: არ გააკრიტიკებს გუნდის წევრებს და არც მათი მხარდამჭერი იქნება, არც საჯაროდ გამოვა და არც დახურულ კონსულტაციებს გასცემს.

პირველ არხთან "ერთ-ერთ საბოლოო ინტერვიუში" ივანიშვილის ათეულობით წინა დაპირების შემდეგ კიდევ 5 მნიშვნელოვან დაპირებას ტოვებს.

დაპირება #1: არ გააკრიტიკებს გუნდის წევრებს

"არცეთნაირი კრიტიკა ჩემი მათგან არ მოხდება", — თქვა მან ლაკონურად.

დაპირება #2: არც დაურეკავს ყოფილ თანაგუნდელებს

იმის დასამტკიცებლად, რომ ის მართლა ყველანაირ კავშირს წყვეტს პოლიტიკასთან, ივანიშვილი იმის პირობასაც დებს, რომ თანაგუნდელებს არც კი დაურეკავს. შეიძლება, დაბადების დღეები მიულოცოს, რადგან, როგორც ამბობს, ბევრი მათგანი უყვარს, მაგრამ პოლიტიკურ თემებზე არ გაესაუბრება.

მეტიც ივანიშვილმა მოუწოდა თანაგუნდელებს, თავს პატივი სცენ და არც მათ დაურეკონ რჩევების საკითხავად.

"არანაირი დარეკვა რომელიმე გუნდის წევრზე, რომლებიც ძალიან მიყვარს, კიდევ ვიმეორებ, და ძალიან დიდ პატივს ვცემ და შენიშვნის მიცემა, რომ შენ ეს კარგად არ გააკეთე და არ გამოგივიდა და მე ეს რამდენჯერმე გამეორებული მაქვს გუნდთან, რომ არ დაელოდოთ და ნუ დაელოდებით ჩემგან შენიშვნებს — თქვენ იქნებით აბსოლუტურად ამ მხრივ თავისუფალი და პირიქითაც, ნუ აკადრებთ თქვენს თავს და ნურც მე, ნუ დამირეკავთ და ნუ მომცემთ კონსულტაციებზე რჩევის შეკითხვებს", — თქვა მან.

დაპირება #3: აღარ მისცემს გუნდის წევრებს კონსულტაციებს

როგორც ივანიშვილი ამბობს, თანაგუნდელებს ხშირად ხვდებოდა და ეუბნებოდა, რომ თუ რჩევა სჭირდებოდათ, სჯობდა მოესწროთ, სანამ დრო ჰქონდათ, რადგან პოლიტიკიდან წასვლის შემდეგ კონსულტაციები შეწყდებოდა.

"მე აღარ ვაპირებ კონსულტაციების მიცემას გუნდისთვის და გუნდის წევრებმა ეს ძალიან კარგად იციან. დიდმა ნაწილმა, ლიდერების ნაწილმა. როგორ გითხრათ, რამდენიმე კომიტეტი გვქონდა, საგარეო თემებზე ვხვდებოდით პარტიებში, ეკონომიკური საბჭო, კომიტეტები კი არა საბჭო. საბჭოს წევრებთან თვეების განმავლობაში მქონდა საუბარი წასვლის შესახებ", — განაცხადა მან.

დაპირება #4: შეწყვეტს საჯარო აქტივობას

ივანიშვილი ამბობს იმასაც, რომ სრულად ყოფით ცხოვრებაში ბრუნდება, რომელიც ძალიან მოსწონდა და ისევ მოსწონს, ამიტომ ყველანაირ საჯარო აქტივობას, გამოსვლებსა და ინტერვიუებს წყვეტს.

"არ მოხდება ჩემი საჯარო გამოსვლა. მე როდესაც გავიხსენე 2011 წელი, მე მხედველობაში მქონდა, რომ საჯაროობას ვწყვეტ. ალბათ, ბოლო ინტერვიუ იქნება თქვენთან, რამდენიმე უცხო მედიას აქვს სურვილი გუშინდელი განცხადების შემდგომ და შეიძლება ხვალ-ზეგ ეს გავაკეთო", — ამბობს ის.

დაპირება #5: არ იქნება ქართული ოცნების მხარდამჭერი

მას შემდეგ, რაც თანაგუნდელებს კრიტიკასა და რჩევებზე უარი უთხრა, ივანიშვილი კიდევ ერთი პირობას დებს, რომ არც მხარდამჭერი იქნება.

"არც მხარდამჭერი არ ვიქნები ქართული ოცნების. მაქსიმალური ჩემი მოქალაქეობრივი აქტიურობა იქნება არჩევნებზე მისვლა და იქ ჩემი პოზიციის დაფიქსირება. და არა მეტი ნებისმიერი მოქალაქისა", — ამტკიცებს ის.

ქართული ოცნების თავმჯდომარემ, ბიძინა ივანიშვილმა 11 იანვარს განაცხადა, რომ ის პოლიტიკიდან მიდის. პარტიის ახალი თავმჯდომარეობის კანდიდატად ირაკლი კობახიძე დასახელდა.

გაიგეთ მეტი ივანიშვილის ინტერვიუზე: