საპარლამენტო უმრავლესობის ლიდერი, ლადო კახაძე აცხადებს, რომ თანახმაა ქვეყანაში შემოტანილი კორონავირუსის პირველი ვაქცინა თავად გაიკეთოს.

"მე მზად ვარ და თანახმა ვარ, პირველი ვაქცინა, რომელიც შემოვა და როგორც ასაკით [ინფიცირების რისკ ჯგუფში მყოფი], როგორც დარგის სპეციალისტი, როგორც საკანონმდებლო სივრცის [წარმომადგენელი], საჯაროდ, ყველას დასანახად, ეს ვაქცინა გავიკეთო", — განაცხადა ლადო კახაძემ.

დეპუტატმა ჯანმრთელობის დაცვისა და სოციალურ საკითხთა კომიტეტის სხდომაზე, ვაქცინაციის მიმართ საზოგადოების ნდობაზე ისაუბრა.

"დღესაც, ბევრი ვაქცინაციის მოწინააღმდეგეა. ზოგიერთი საერთოდ, გაგიკვირდებათ და როცა გაეცნობი, უყურებ ამ მასმედიის საშუალებებს თუ იქნები სოციალურ ქსელში, საერთოდ ვირუსის არსებობასაც უარყოფს და დაიბნა მოსახლე", — ამბობს კახაძე.

იგი განმარტავს, რომ აცრა არის პრევენციული მეთოდი ინფიცირების თავიდან ასაცილებლად.

"აცრა პრევენციაა, გონიერი პრევენცია. ეს არის მეცნიერულ საფუძველზე დაყრდნობით და სივერაგეს ასცდა კაცობრიობა ამ მეთოდით. აცრის სწორად გამოყენებით", — განაცხადა ლადო კახაძემ.

დღეს, ჯანმრთელობის დაცვისა და სოციალურ საკითხთა კომიტეტის სხდომაზე განიხილეს კანონპროექტი, რომლის მიხედვითაც, კორონავირუსის ვაქცინის გამოყენების შედეგად გამოწვეულ შესაძლო ზიანზე პასუხისმგებლობას სახელმწიფო აიღებს. გამონაკლისია ის შემთხვევები, როცა ზიანი გამოწვეული იქნება სამედიცინო პერსონალის, სამედიცინო დაწესებულების იმპორტიორის, ან მწარმოებლის შეცდომით.

გაიგეთ მეტი: