ქართული ოცნების ყოფილი თავმჯდომარის, ბიძინა ივანიშვილის განცხადებით, პოლიტიკიდან მეორედ, ამჯერად საბოლოოდ, მშვიდად მიდის. ამის შესახებ მან გამოცემა Entrepreneur-თან ინტერვიუში განაცხადა.

"მართალია, ორი წლის წინ პოლიტიკაში დაბრუნება დამჭირდა, როცა გუნდის ერთიანობას და იდეას საფრთხე შეექმნა, მაგრამ დღეს, როცა უკვე პოლიტიკიდან ჩემი წასვლის გადაწყვეტილება საბოლოოა და გადახედვას აღარ ექვემდებარება, გაცილებით მშვიდად ვარ, რადგან გუნდი, რომელსაც ვტოვებ, მზადაა თავად აგოს პასუხი საკუთარ თავზე და, თუ საჭირო გახდა, სხვასაც აგებინოს", — ამბობს ივანიშვილი.

იგი ამბობს, რომ მისი მსოფლმხედველობრივი დამოკიდებულებაა აკეთოს ის, რაც მის გარეშე ვერ მოხერხდება მანამ, სანამ ამის აუცილებლობა იქნება.

"პოლიტიკაშიც, ისევე როგორც ბიზნესში, მსოფლმხედველობრივი დამოკიდებულება იყო მთავარი — გამეკეთებინა ის, რის გაკეთებაც ჩემს გარეშე ვერ მოხერხდებოდა და დავრჩენილიყავი მანამ, სანამ ამის აუცილებლობა იქნებოდა", — განაცხადა ბიძინა ივანიშვილმა.

გუშინ, 11 დეკემბერს, ბიძინა ივანიშვილმა გამოაქვეყნა ვრცელი წერილი, სადაც ამბობს, რომ პოლიტიკიდან მიდის. ამჯერად, საბოლოოდ.

გაიგეთ მეტი: