ევროპული საქართველოს წევრის, ირაკლი აბესაძის განცხადებით, პოლიტიკოსი ბიძინა ივანიშვილი პოლიტიკურ კრიზისზე გაურბის პასუხისმგებლობას, ბიზნესმენი ივანიშვილი კი ეკონომიკურ კრიზისსა და სიღარიბეზე.

"როგორ და სად მიდის ბიძინა? პოლიტიკოსი ბიძინა გაურბის პასუხისმგებლობას პოლიტიკურ კრიზისზე და ბიზნესმენი (ოლიგარქი) ივანიშვილი გაურბის პასუხისმგებლობას უმძიმეს ეკონომიკურ კრიზისსა და სიღარიბეზე... ქვეყნის "პატრონი" ოლიგარქის მესიჯი, რომ ამ ქვეყანაში ის ბიზნესს აღარ აწარმოებს, რა თქმა უნდა. ძალიან მძიმე მესიჯია ადგილობრივი და უცხოელი ინვესტორებისთვის...", — წერს აბესაძე ფეისბუქგვერდზე.

აბესაძე, ასევე, აცხადებს, რომ ივანიშვილმა 2020 წლის 30 და 31 დეკემბერს სხვადასხვა ფინანსური სქემებით საქველმოქმედო ფონდ ქართუს საკუთრებაში გადასცა პირადი რეზიდენცია თბილისში(საკუთრებაში მხოლოდ ვერტმფრენის დასაჯდომი მოედანი დაიტოვა), ქართუს ცენტრალური ბიზნესცენტრი ჭავჭავაძის გამზირზე, პანორამა თბილისი თაბორის მთაზე და ცეკავშირის შენობა თავისუფლების მოედანზე, სასტუმრო პარაგრაფი შეკვეთილში, პარაგრაფი მწვანე კონცხი, ლაგუნა ვერე და აბრეშუმის ფაბრიკა, სამშენებლო კომპანიები — ბურჯი, ელიტა ბურჯი.

დღეს, 11 იანვარს ცნობილი გახდა, რომ ბიძინა ივანიშვილი პოლიტიკიდან მიდის.

ბიძინა ივანიშვილი ქართული ოცნების თავმჯდომარეობას ოფიციალურად 2018 წლის გაზაფხულზე დაუბრუნდა. ივანიშვილის საჯარო გააქტიურებიდან მალევე გადადგა პრემიერმინისტრი, გიორგი კვირიკაშვილი. მისი თავმჯდომარეობის დროს დაწინაურდა და პრემიერმინისტრი გახდა გიორგი გახარია, რომლის შსს-ს მინისტრობის დროს ე.წ. გავრილოვის ღამეს აქციის მონაწილეები ძალის გამოყენებით დაშალეს და რამდენიმე ადამიანმა თვალი ან მხედველობა დაკარგა.

ივანიშვილის დაბრუნების შემდეგ კიდევ ერთი პოლიტიკური მეორედ მოსვლა ვიხილეთ, კერძოდ, თავდაცვის მინისტრის პოსტზე დაბრუნდა ყოფილი პრემიერმინისტრი, ირაკლი ღარიბაშვილი.

ბოლო ორწელიწად-ნახევრის განმავლობაში ივანიშვილი არ ყოფილა საჯაროდ აქტიური. თუმცა მან თავი დაამახსოვრა საზოგადოებას საპრეზიდენტო არჩევნებამდე რამდენიმე დღით ადრე გავრცელებული ემოციური მიმართვით, სადაც "მართვის ხარვეზების გამოსასწორებლად" ერთ წელს ითხოვდა.

კიდევ ერთი დაპირება, რომელიც მან გასცა და არ შესრულდა, პროპორციულ არჩევნებს ეხებოდა. ოპოზიციასთან და საერთაშორისო პარტნიორებთან შეთანხმებული სრულად პროპორციული საარჩევნო სისტემა ქართულმა ოცნებამ ჩააგდო. როგორც შემდგომში მმართველ პარტიაში განმარტავდნენ, ბიძინა ივანიშვილის დაპირებას "პრინციპული დეპუტატები" აუმხედრდნენ. "პრინციპული დეპუტატების" ნაწილი ახლაც პარლამენტში, უკვე დაწინაურებულ პოზიციებს იკავებს.

პანდემიის პერიოდში ივანიშვილის გამოსვლები კიდევ უფრო შემცირდა. მისი საჯაროდ ხილვა მხოლოდ საზოგადო მოღვაწეების პანაშვიდებზე, კანდიდატების წარდგენაზე, არჩევნებზე ხმის მიცემის დროს და ბერა ივანიშვილის TikTok-ზე იყო შესაძლებელი. განსაკუთრებული კრიტიკა სწორედ ამ უკანასკნელმა დაიმსახურა. ოპოზიციაში აცხადებდნენ, რომ პანდემიისა და ეკონომიკური კრიზისის ფონზე, ვიდეოში ცეკვა უადგილო იყო.