საქართველოში ისრაელის ელჩი, რან გიდორი საგარეო საქმეთა მინისტრის, დავით ზალკალიანის განცხადებას ანტი-სემიტიზმის დაგმობასთან დაკავშირებით, დადებითად აფასებს და მას რასიზმთან წინააღმდეგ ძალების გაერთიანებისკენ მოუწოდებს.

"მივესალმები ზალკალიანის მნიშვნელოვან განცხადებას, რომელიც ხაზგასმით გმობს ანტი-სემიტიზმს და გამოხატავს სოლიდარობას ებრაელი ხალხის მისამართით. ჩვენ უნდა გავერთიანდეთ, რათა შევძლოთ ექსტრემისტების, რასისტებისა და ქსენოფობების მარგინალიზება", — წერს ელჩი.

ზალკალიანმა გუშინ განაცხადა, რომ ანტისემიტიზმის უმცირესი გამოვლინებაც კი ქართველის გონებაში ადგილს ვერ იპოვის. მან აღნიშნული ტვიტი გამოაქვეყნა ისრაელის ელჩის რან გიდორის განცხადების შემდეგ, რომელმაც საქართველოს მთავრობას მოუწოდა, დაგმოს სიძულვილით სავსე ანტისემიტური გამოსვლები.