შინაგან საქმეთა სამინისტროს განცხადებით, ციცინათელას პარკში დაჭრისა და შემდეგ ქობულეთში სროლის საქმეზე ძებნილი, 40 წლის პირი დააკავეს. მას 2020 წლის აგვისტოდან ეძებდნენ.

უწყების ინფორმაციით, ბრალდებულმა 7 აგვისტოს პარკის ტერიტორიაზე ორი პირი დაჭრა, რის შემდეგაც მანქანით დაჭრილების ახლობლებს დაედევნა და ქობულეთში მათი მანქანის მიმართულებით რამდენჯერმე გაისროლა. როგორც შსს-ში განმარტავენ, ამის შედეგად ერთი პირი დაიჭრა, ხოლო ბრალდებული ადგილიდან მიიმალა.

შსს-ს ინფორმაციით, მას ბრალი დაუსწრებლად წარედგინა, შემდეგ კი დაიწყო ძებნა. პოლიციამ ძებნილი 6 იანვარს, საგარეჯოს მუნიციპალიტეტის სოფელ თოხლიაურში დააკავა. უწყებაში აღნიშნავენ, რომ ნივთმტკიცების სახით ამოიღეს: "მაკაროვის" სისტემის 2 პისტოლეტი, WEİHRAUCH MELLRİCHSTADT-ის მოდელის რევოლვერი, 3 მჭიდი, 47 ვაზნა და 2 დანა.

ბრალდებულის მიმართ გამოძიება დამამძიმებელ გარემოებაში ჩადენილ განზრახ მკვლელობის მცდელობის, ძალადობისა და ცეცხლსასროლი იარაღის მართლსაწინააღმდეგო შეძენა-შენახვა-ტარების მუხლებით მიმდინარეობს. დანაშაულები 7-დან 17 წლამდე ვადით თავისუფლების აღკვეთას ითვალისწინებს.