"მოწოდებები მუსლიმებისთვის შეერთებულ შტატებში შესვლის აკრძალვაზე, შეურაცხმყოფელი და არაკონსტიტუციურია" - ასეთი მოსაზრება ჰქონდა ამჟამად აშშ-ის ვიცე-პრეზიდენტსა და პოსტის გამოქვეყნების დროს ინდიანას გუბერნატორს, მაიკ პენსს, 2015 წელს. მან აღნიშნული პოსტი ტვიტერზე გამოაქვეყნა. 2017 წლის იანვარში კი პენსის თანაგუნდელმა, პრეზიდენტმა დონალდ ტრამპმა მილიონობით მუსლიმს ქვეყანაში შესვლა აუკრძალა.

28 იანვარს, ამერიკის შეერთებული შტატების პრეზიდენტმა, დონალდ ტრამპმა ხელი მოაწერა ბრძანებას, რომლის მიხედვით 134 მილიონზე მეტ ადამიანს მსოფლიოს 7 მუსლიმური ქვეყნიდან აშშ-ში შესვლა აეკრძალა. ფოტოზე კი, პენსს უკმაყოფილება ნამდვილად არ ეტყობა, მეტიც, ვიცე-პრეზიდენტს ასეთი პოზიცია არც დაუფიქსირებია.

ფოტოზე: მაიკ პენსი (ვიცე-პრეზიდენტი), დონალდ ტრამპი და ჯეიმს მატისი (თავდაცვის მდივანი).

ფოტო: Mandel Ngan / AFP / Getty Images

ერაყის, სირიის, ირანის, ლიბიის, სომალის, სუდანისა და იემენის მოსახლეობისთვის დაწესებული შეზღუდვა ჯერჯერობით დროებითია - 7 მუსლიმური ქვეყნის მოქალაქეებს ამერიკაში შესვლა 90 დღის განმავლობაში ეკრძალებათ, თუმცა თეთრი სახლის ოფიციალური პირების თქმით, ეს ნაბიჯი უფრო დიდი ბარიერის დაწესების წინაპირობაა.