ჯანდაცვის მინისტრის მოადგილის, თამარ გაბუნიას განცხადებით შეზღუდვებამდე Covid-19-ის მაჩვენებელი ორჯერ უფრო მაღალი იყო, ამიტომ არსებული ციფრები მიუთითებს იმაზე, რომ შეზღუდვებმა შედეგი მოიტანა.

"შეზღუდვებამდე ეს [კორონავირუსის შემთხვევების] მაჩვენებელი ორჯერ უფრო მაღალი იყო და ეს მიუთითებს იმაზე, რომ შეზღუდვებისა და მობილობის შემცირების ფონზე შედეგი მნიშვნელოვნად პოზიტიურია", — განაცხადა გაბუნიამ.

5 იანვრის მონაცემებით, საქართველოში კორონავირუსის 2 316 ახალი შემთხვევა დადასტურდა, გამოჯანმრთელდა — 382, ხოლო გარდაიცვალა — 18.

უწყებათაშორის საკოორდინაციო საბჭოსთან არსებული ოპერაციული შტაბის უფროსის მოადგილის, ბერდია სიჭინავას განცხადებით, ბოლო 24 საათში ქვეყნის მასშტაბით ჩატარდა 14 511 ტესტი, მათ შორის 9 300 კვლევა ანტიგენისა და 5 211 PCR ტესტით.