საქართველოს პროკურატურამ ბორჯომში შვილის მკვლელობაზე დედას ბრალდება განზრახ მკვლელობის მუხლით წარუდგინა. უწყების ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ ბორჯომში, 2021 წლის პირველ იანვარს, ღამის საათებში, საცხოვრებელ სახლში ურთიერთშელაპარაკების დროს, დედამ შვილს დანით გულმკერდის არეში ჭრილობა მიაყენა. მიყენებული დაზიანების შედეგად, 41 წლის კაცი ადგილზე გარდაიცვალა.

მკვლელობაში ბრალდებული პირველ იანვარს დააკავეს. მას ბრალდება საქართველოს სისხლის სამართლის კოდექსის 109-ე მუხლის მეორე ნაწილის ,"ვ" ქვეპუნქტით [ოჯახის წევრის მიმართ განზრახ მკვლელობა] წარედგინა, რაც სასჯელის სახედ და ზომად 13-დან 17 წლამდე თავისუფლების აღკვეთას ითვალისწინებს.

მათივე ინფორმაციით, პროკურატურამ, ბრალდებულის მიმართ, აღკვეთის ღონისძიების სახით პატიმრობის გამოყენების შუამდგომლობით ახალციხის რაიონულ სასამართლოს უკვე მიმართა. სისხლის სამართლის საქმეზე გამოძიება გრძელდება.