საპენსიო სააგენტოს ცნობით, ბოლო ორი წლის განმავლობაში დაგროვებითი პენსიით ისარგებლა 606-მა ადამიანმა, მათ შორის, 264-ს საპენსიო ასაკი შეუსრულდა, 1-მა საზღვარგარეთ მუდმივსაცხოვრებლად გადასვლის გამო ისარგებლა, 257-მა პირმა შეზღუდული შესაძლებლობების მქონე პირის სტატუსის საფუძვლით მიიღო, ხოლო მემკვიდრის უფლებით ისარგებლა — 84 პირმა.

ინფორმაცია ამის შესახებ საპენსიო სააგენტომ გაავრცელა. მათივე ცნობით, საპენსიო სქემაში ჩართულების რაოდენობა, საშუალოდ, თვეში 12 000-ზე მეტს შეადგენს. საპენსიო აქტივები განთავსებულია საინვესტიციო პოლიტიკის დოკუმენტის შესაბამისად, ქართულ კომერციულ ბანკებში სარგებლიან მიმდინარე ანგარიშებზე, ვადიან დეპოზიტებსა და სადეპოზიტო სერტიფიკატებში და ამ დროისათვის სრულად ლარშია დენომინირებული.

31 დეკემბრის მდგომარეობით საპენსიო აქტივებს ერიცხება წლიური 10.9% სარგებელი. კაპიტალის ბაზრის ინსტრუმენტებში ინვესტირება საინვესტიციო პოლიტიკის დოკუმენტის შესაბამისად, უახლოეს პერიოდში, სპეციალიზებული დეპოზიტარის შერჩევის შემდეგ დაიწყება.

ასევე, საპენსიო სააგენტოს ინფორმაციით, საპენსიო აქტივების მოცულობამ 1,2 მილიარდი ლარი შეადგინა, საიდანაც დარიცხული სარგებელი 103 მილიონი ლარია.