კალორიების დათვლა იმ ადამიანებისთვის ვისაც ჭარბი წონა აწუხებს ან სასურველი ფორმის შენარჩუნება უნდათ, ჩვეულებრივი მოვლენაა. შესაბამისად მნიშვნელოვანია იცოდეთ რომელი პროდუქტი რამდენად კალორიულია და ამასთან ერთად გაიგოთ ისიც, თუ რა სარგებელი მოაქვს მათ თქვენი ორგანიზმისათვის.

1. ბროკოლი - 25 კალორია

გარდა იმისა, რომ ბროკოლი ერთ-ერთი ყველაზე დაბალკალორიული ბოსტნეულია, ის ძალიან სასარგებლოა ჩვენი ორგანიზმისათვის. ბროკოლი მდიდარია ვიტამინებითა და მინერალებით, ყველაზე დიდი რაოდენობით კი C ვიტამინს შეიცავს, რომლის შემცველობაც ორჯერ მეტი აქვს ვიდრე ნებისმიერ ციტრუსს. სისხლის შემცველობასთან ერთად აუმჯობესებს მის მიმოქცევასაც და ხელს უწყობს კუჭ-ნაწლავში არსებული წყლულებისა თუ სხვა დარღვევების მკურნალობას ან მათ პროფილაქტიკას.

ბროკოლი აქტიურად გამოიყენება სიმსივნის წინააღმდეგ საბრძოლველადაც, რადგან მასში განსაკუთრებული ნივთიერება - სულფორაფანი გვხვდება. სულფორაფანი ეფექტურად ანადგურებს კუჭის წყლულის გამომწვევ ბაქტერიებს და ამ დროს ხდება სიმსივნური უჯრედების გაჩენის პრევენციაც.

2. კომბოსტო - 28 კალორია

კომბოსტოს აქტიურად იყენებენ თითქმის ყველა ქვეყნის სამზარეულოში და მისი მრავალი სახეობა არსებობს, თუმცა მათ შორის ყველაზე დაბალკალორიული თეთრი კომბოსტოა, რომელიც 100 გრამზე 28 კალორიას შეიცავს.

კომბოსტო იდეალური არჩევანია მათთვის, ვისაც თირკმელების სწორი ფუნქციონირების პრობლემა აწუხებს, ის ასევე სასარგებლოა ფარისებრი ჯირკვლებისთვის. U ვიტამინს დიდი რაოდენობის შემცველობის გამო კი, კუჭის წყლულის სამკურნალოდაც გამოიყენება, ასევე აწესრიგებს სხვა ნაწლავურ დაავადებებსა და დარღვეულ მეტაბოლიზმს.

3. ლიმონი - 31 კალორია

გარდა იმისა, რომ ლიმონი დიდი რაოდენობით C ვიტამინის შემცველობით არის ცნობილი, ის ძალიან დაბალკალორიულია. გაციების ან გრიპის დროს ალბათ ხშირად გირჩიეს ლიმონიანი ჩაი დაგელიათ, რადგან ლიმონი მდიდარია სხვადასხვა ვიტამინებით, ამიტომ საკმაოდ ეფექტური საშუალებაა სეზონური ინფექციების დასაძლევად და იმუნიტეტის გასაუმჯობესებლად.

4. უცხიმო კეფირი - 30 კალორია

კეფირი მისი სამკურნალო თვისებებით საკმაოდ ცნობილია, ისევე როგორც იოგურტი ან აირანი. ამ შემთხვევაში კი კეფირი თავისი დაბალი კალორიულობითა და სასარგებლო შემადგენლობით ნამდვილად გამორჩეული რძის პროდუქტია.

5. კიტრი - 15 კალორია

ჩვენი სიის ყველაზე დაბალკალორიული ბოსტნეული კიტრია, ის მსოფლიოში ფართოდ გავრცელებული პროდუქტია, რომელსაც აქტიურად იყენებენ ყოველდღიური კვების რაციონში, სალათებში, ხილთან ერთად, დიეტის დაცვისას და ა.შ. კიტრი მომნელებელი სისტემის გამართულად ფუნქციონირებისათვის ძალიან კარგი საშუალებაა, ის ასევე აუმჯობესებს მეხსიერებასა და ნერვული სისტემის მდგომარეობას, ერთგვარი დამამშვიდებლის ფუნქციაც აქვს.

სხეულის სიჯანსაღისა და ფორმის შესანარჩუნებლად გრამებისა და კალორიების თვლა აუცილებელი არ არის, ამისთვის ყოველდღიური რაციონის სასარგებლო და ნატურალური პროდუქტებით გამდიდრებაც საკმარისია.