ელენე ხოშტარიამ ევროპულ საქართველოს საუბრისას განაცხადა, რომ ის გუნდია, სადაც პოლიტიკურად ფეხი აიდგა და ბევრი რამ ისწავლა.

"პრეტენზია კი არ მაქვს, რომ აქ არასწორად კეთდება და მე სხვანაირად მინდა. ვერაფრით ვერ მექნება პრეტენზია. მე ვარჩიე, ისე, როგორც მიმაჩნია სწორად — გავაკეთო ცალკე. არც დროა კონფლიქტის, არც საფუძველი. ჩემთვის ეს ის გუნდია, სადაც პოლიტიკურად ფეხი ავიდგი, ბევრი გამოცდილება შევიძინე, ბევრი არჩევნები გავიარეთ. არჩევნები, მოგეხსენებათ, ინტენსიური პროცესია, მათ შორის, თანამშრომლობის. უამრავი ადამიანია, რომელიც თავდადებით, ერთად ვმუშაობდით, ყველა მათგანს ძალიან დიდი პატივს ვცემ", — განაცხადა ელენე ხოშტარიამ.

ელენე ხოშტარიამ პარტია ევროპული საქართველო დატოვა. ამის შესახებ პარტიაში გამართულ ბრიფინგზე თავად განაცხადა. მისი თქმით, პარტიაში დაპირისპირება არ ყოფილა, შესაბამისად, ეს არ გახმდარა ამ გადაწყვეტილების მიზეზი.

"მივიღე გადაწყვეტილება დავიწყო დამოუკიდებელი პოლიტიკური ცხოვრება, არ გადავდივარ სხვა პარტიაში და ძალიან მყარად ვრჩები ოპოზიციურ ერთობაში. არც კი განვიხილავ პარლამენტში შესვლას და ჩემი პოზიცია რჩება იგივე. მაქვს ახალი გეგმები პოლიტიკურ ცხოვრებაში, ახალი პლატფორმის და პოლიტიკური ძალის შექმნა", — განაცხადა ხოშტარიამ.

ელენე ხოშტარია 2016-2020 წლებში საქართველოს მე-9 მოწვევის პარლამენტის წევრი იყო. 2017 წელს ევროპულმა საქართველომ თბილისის მერობის კანდიდატად წარადგინა. რაც შეეხება 2020 წლის საპარლამენტო არჩევნებს, აქ ხოშტარია ვაკის მაჟორიტარულ ოლქში ოპოზიციის დეპუტატობის კანდიდატი იყო.