საერთაშორისო განჭვირვალობა — საქართველოს ახალი კვლევის თანახმად, 2008-2020 წლებში ჩატარებული 10 არჩევნების წინასაარჩევნო პერიოდში პოლიტიკურმა სუბიექტებმა ჯამში 225 მილიონი ლარამდე დახარჯეს, საიდანაც 134 მილიონი ლარი, ანუ დახარჯული ფულის 59%, პოლიტიკურ რეკლამებზე მოდიოდა.

TI-ის ინფორმაციით, ყველაზე მეტს რეკლამაში მმართველი პარტიის სუბიექტები ან მათი მხარდაჭერილი კანდიდატები ხარჯავენ, რაც 2008-2020 წლებში 98 მილიონ ლარს შეადგენს. ეს პოლიტიკური სუბიექტების მიერ რეკლამაში ჯამურად დახარჯული თანხის 73%-ია.

ორგანიზაციის ცნობით, ერთადერთი გამონაკლისი 2013 წლის საპრეზიდენტო არჩევნებია, როცა მმართველმა პარტიამ რეკლამისთვის მხოლოდ 471 ათასი ლარი დახარჯა, ხოლო ოთხჯერ მეტი — 2,1 მილიონი ლარი, ნინო ბურჯანაძის ოპოზიციურმა პარტიამ და 1,1 მილიონი ლარი ერთიანმა ნაციონალურმა მოძრაობამ.

ფოტო: TI

გარდა ამისა, TI-ის კვლევით დადგინდა, რომ:

  • სარეკლამო ხარჯებიდან პოლიტიკური სუბიექტები ყველაზე მეტს სატელევიზიო რეკლამაში ხარჯავენ. 2008-2020 წლებში ეს ხარჯი 79 მილიონ ლარზე მეტი (რეკლამისთვის დახარჯული თანხის 59%) იყო.
  • საარჩევნოდ რეკლამისთვის ყველაზე მეტი — 29,1 მილიონი ლარი, 2020 წლის პარლამენტის, ხოლო ყველაზე ცოტა — 3,8 მილიონი ლარი, 2013 წლის პრეზიდენტის არჩევნებში დაიხარჯა.
  • წინასაარჩევნო რეკლამებიდან ერთ-ერთი ყველაზე მზარდი ინტერნეტრეკლამის ხარჯია — 2012 წელს, წინასაარჩევნო პერიოდში, 50 ათასი ლარი დაიხარჯა, 2018 წელს ამ ხარჯმა 800 ათას ლარს გადააჭარბა, ხოლო 2020 წელს — 3 მილიონ ლარს. ყველაზე ნაკლები კი ბრენდირებული აქსესუარებით რეკლამის ხარჯია — 2012-2020 წლებში ჯამში 1 მლნ ლარამდე.

ორგანიზაციის ინფორმაციით, პოლიტიკური სუბიექტების მიერ საარჩევნო დეკლარაციები ხარვეზებით არის შევსებული, განსაკუთრებით, 2008-2011 წლებში. TI-ის განცხადებით, ამის გამო ხშირად რთული ან პრაქტიკულად შეუძლებელია ცალკეული მონაცემების დამუშავება. მათივე ცნობით, მართალია, 2012-2020 წლებში დეკლარაციის ფორმები და შევსების სტანდარტიც შედარებით დაიხვეწა, თუმცა კვლავ ხშირად არის არაერთგვაროვნად შევსებულ დეკლარაციები, რაც მონაცემების ანალიზს ართულებს.